Жэймс Камерон “Аватар” цувралын зураг авалтыг дахин эхлүүлжээ...

2020-05-13 22:29:57

Жэймс Камерон найруулагч “Аватар” киноны дараагийн ангийн зураг авалтыг дахин эхлүүлжээ.

5-р сарын 9-ны өдөр “DEADLINE” сайтад телевиз, киноны уран бүтээлчид аюулгүй нөхцөл байдалд зурагт авалтаа дахин эхлүүлсэн гэж нийтэлжээ. Жэймс Камерон найруулагч “Аватар 2”-оос “Аватар 5”-ын зураг авалтыг эхлүүлсэн байна. Тэрээр 2-оос 5-р ангийн зураг авалтыг нэгэн зэрэг хийж байсан боловч дэлхий нийтийг хамарсан цар тахлын улмаас 2 сар орчим зураг авалтын ажил зогссон гэжээ.  

Харин 4-р сарын 27-ны өдөр Шинэ Зеландын ерөнхий сайд Жасинда Ардерн коронавирусын тархалтын талаарх хэвлэлийн бага хурлын үеэр “Бид хамтдаа чадлаа” гээд Шинэ Зеланд улс коронавирусын халдваргүй болсноо зарлажээ. 

Шинэ Зеланд улс 1 сарын турш улсын хэмжээнд хөл хорионы хатуу дэглэм тогтоож, эмнэлэг, эмийн сан, хүнсний дэлгүүр зэрэг шаардлагатай аж ахуйн нэгжээс бусад бүх аж ахуйн нэгжийн үйл ажиллагааг зогсоосон байна. Их дээд сургууль төдийгүй ерөнхий боловсролын сургуулийн үйл ажиллагааг мөн адил зогсоожээ.  

5-р сарын 9-ны өдрийн байдлаар Шинэ Зеланд улсад коронавирусийн халдвар шинээр бүртгэгдээгүй байна. Тиймд уран бүтээлүүдийн зураг авалтуудыг дахин эхлүүлжээ. 

Уран бүтээлийн багийнхны мэдээлснээр “Аватар 2” кино 2021 оны 12-р сарын 17-ны өдөр, “Аватар 3” кино 2023 оны 12-р сард, “Аватар 4” кино 2025 оны 12-р сард, “Аватар 5” кино 2027 оны 12 сард нээлтээ хийх ажээ.