TENET 7-р сарын 31-нд нээлтээ хийхээр болжээ...
2020-06-25 20:35:29
Кристофер Нолан найруулагчийн шинэ бүтээл “Tenet” нь дэлхийн кино шүтэн бишрэгчдийн 2020 оны хамгийн их хүлээлттэй киногоор тодроод байна. Коронавируст халдварын улмаас зогсонги байдалд орсон дэлхийн кино ертөнцөд сэргэлт болох бүтээл хэмээн кино сонирхогчид үзэж байна. Нолан найруулагч нэг хоногийн өмнө ч болов үзэгчдэд хамт кино үзэх баяр хөөр, итгэл найдварыг түгээхийн тулд зоригтойгоор видео сангаар үзэгчдэд хүргэх бус кино театрт нээх шийдвэрийг гаргаад байна.
“Tenet” кино бол дэлхийн 3-р дайныг зогсоохын тулд урвуу цаг хугацааны урсгалыг ашиглан аюулыг зогсоохоор тэмцэж буй сонирхолтой тулаантай блокбастер кино юм. Өмнөх бүтээлүүддээ ч гурван хэмжээст ертөнцийг харуулж байсан Нолан найруулагч “Tenet” кинонд мөн адил орон зай цаг хугацааг онцолжээ.
Тус киноны зураг авалтыг дэлхийн 7 улсад хийсэн байна. Энэ нь хамгийн олон улсад зураг авсан кино болж байгаа юм. Мөн Нолан найруулагч IMAX камер, 70 мм хальс ашиглан өөрийн өвөрмөц онцлог болох дэлгэц дүүрэн гарах тулаан бүр нь “Tenet” киног заавал кино театрт үзэх ёстой шалтгаануудын нэг юм.
Гол дүрийн жүжигчин Жон Дэвид Вашингтон бол алдарт жүжигчин Дензел Вашингтоны хүү бөгөөд “Алтан Бөмбөрцөг” наадмын “Шилдэг эрэгтэй гол дүр” номинацад нэр дэвшиж, эцгээсээ дутахааргүй жүжиглэх авьяастай гэдгээ батлан харуулсан. Жон Дэвид Вашингтон болон Кристофер Нолан найруулагч нар анх удаа хамтран ажиллаж байгаа бөгөөд мөн Шинэ Бэтмэн Роберт Паттинсон болон Кеннет Брана, Элизабет Дебики, Аарон Жонсон, Майкл Кейн нар хамтран тоглох ажээ.
“Tenet” кино нь өгүүлэл, хэмжээс, гоёмсог тулаан гээд үзэгчдийн мэлмийг хужирлах олон зүйл гарах бөгөөд цаг хугацаа, орон зайн талаарх онолыг шинжлэх ухаан талаас тайлбарласан шинэ ухагдахууныг агуулсан энтертайнмент контентыг илүү өргөжүүлж, үзэгчдэд олон янзын тайлбар, таамгийг төрүүлнэ хэмээн кино шүүмжлэгчид дүгнэж байна.
Тус кино 7-р сарын 31-ний өдөр нээлтээ хийхээр төлөвлөж байна.
