“Warner Bros” компани Хоакин Феникст 50 сая долларыг санал болгож дахин хамтарч ажиллах хүсэлт тавьжээ...
2020-09-18 18:26:27
Өнгөрсөн жил нээлтээ хийн дэлхий дахины хүртээл болсон “Жокер” киноны дараагийн анги бүтээгдэх талаар яригдаж байгаа аж. Одоогоор киноны эх зохиол бичигдэж байгаа бөгөөд Жокерын дүрийг бүтээсэн Хоакин Феникст их хэмжээний хөлсийг санал болгож дүр бүтээх талаар хэлэлцэж байгаа аж. 9-р сарын 12-ны өдөр Английн “Mirror” сайтад Тодд Филлипс найруулагчийн найруулсан “Жокер” киноны дараагийн анги бүтээгдэхээр төлөвлөгдөж байгаа бөгөөд “Warner Bros” компани Хоакин Феникст их хэмжээний үнийн саналаар дүр бүтээх санал тавьсан гэж мэдээлжээ. Одоогоор төлөвлөж байгаа кино нь “Жокер” -ын дараагийн анги байх бөгөөд “Mirror”-ийн мэдээлснээр 2022 онд болон 2024 онуудад цувралын үргэлжлэл ангиуд нээлтээ хийнэ гэж найдаж байна хэмээжээ.
“Warner Bros” компани нь Хоакин Фениксийг тоглуулах нөхцөлтэй урт хугацааны гэрээ байгуулахыг хүсэж байгаагаа илэрхийлж 50 сая долларын санал тавьсан байна. Кино багийн холбогдох хүн “Mirror”-т өгсөн ярилцлагын үеэр “Хоакин анх Жокерыг бие даасан кино гэж бодож тоглосон. Кино гарснаас хойш зөрчил маргаан өрнөж байсан ч тус дүрийг дахин бүтээхийг тэрээр хүссэн.” гэж хэлжээ. Улмаар тэр “Одоогоор гэрээ хэлэлцээрийн шатанд байгаа боловч, эх зохиол бичигдэж, Хоакин ч бас оролцож байгаа.” гэж нэмж хэлжээ. Дараагийн ангид найруулагч Тодд Филлипс дахин ажиллахаар болсон бололтой. Киноны холбогдох хүн ““Warner Bros” компани “Жокер” кино амжилттай болсонд их гайхсан. Тус компани Хоакин, Тодд Филлипс найруулагч, Брэдли Купер продюсертой дараагийн ангийг бүтээхээр төлөвлөж байгаа.” гэж хэлсэн байна.
Хоакин Феникст өндөр үнэ санал болгосон нь өнгөрсөн жил нээлтээ хийсэн “Жокер” кино “Warner Bros” компанийн төсөөлснөөс илүү амжилттай болсонтой холбоотой. Бокс оффисын мэдээлснээр тус кино нь дэлхий дахинаас 1,074,251,311 долларын орлого олжээ. “Жокер” кино олны хүртээл болоход шүүмжлэгчид ар араасаа сайн үнэлгээ өгсөн. Ямар нэгэн супер баатартай киноноос дүнхгэр өнгө аястай хэрнээ нийгмийг шүүмжилсэн хүчин зүйлсийг агуулснаараа ялгаатай байсан гэж дүгнэсэн.
“Жокер” нь комискийн эх зохиол нь кино болсон кинонуудаас хамгийн анх Венецийн олон улсын кино наадмаас шилдэг бүтээлийн “Алтан арслан” шагналыг хүртсэн байна. Жокерийн дүрийг бүтээж, үзэгчдийн сэтгэлийг татсан Хоакин Феникс “The Golden Globe Awards”, “The British Film Academy”, “OSCAR” зэргээс шилдэг эрэгтэй гол дүрийн шагналыг хүртсэн. Жокер гэсэн галзуу солиотой хүний дүрийг бүтээхийн зэрэгцээ нууцлаг гунигтай байдлыг бүтээсэн нь үзэгчдийн сэтгэлд хүрсэн. Тодд Филлипс найруулагч, Хоакин Феникс нар “Жокер”-ийн дараагийн ангийг ямар байдлаар бүтээх нь сонирхол татаж байна.
