Анхны хар арьстай Тинкер Белл

2020-10-01 22:32:13

9-р сарын 25-ны өдөр Америкийн “Deadline” сайтад мэдээлснээр жүжигчин Яра Шахиди Диснейн “Peter Pan & Wendy” бүрэн хэмжээний киноны Тинкер Беллийн дүрийг бүтээнэ гэж мэдэгджээ. Тинкер Беллийн дүрийг анх удаа хар арьстай жүжигчин бүтээх аж. 

Өмнө нь Диснейн өөр нэг “The Little Mermaid” гэх бүрэн хэмжээний киноны гол дүрд Хэлли Бэйли сонгогдсон бол энэ удаад Тинкер Беллийн дүрийг мөн хар арьстай жүжигчин бүтээхээр болсонд кинонд дурлагсдын дунд маргаан үүсгээд байна. 

1953 онд бүтээгдсэн Диснейн “Peter Pan” анимэйшний эх зохиолоор хийгдэх “Peter Pan & Wendy” кинонд өтөлдөггүй Питер Пен хүү хүүхдүүдтэй хамт ид шидийн ертөнц Неверленд рүү аялдаг тухай өгүүлдэг. Өнгөрсөн хугацаанд Стивен Спилбергийн “Hook”, Жо Райтын “Pan” гээд олон “Peter Pan” хүүхдийн зохиолоос сэдэвлэсэн кинонууд бүтээгдсэн байдаг.  

Эдгээр кинонд Тинкер Белл нь Питер Пений хамгийн дотны найзаар гардаг ба Спилбергийн кинонд  Жулиа Робертсийн бүтээсэн дүр үзэгчдийн сэтгэлд тод үлдсэн байдаг. Сүүлийн үед Дисней компани цагаан арьст жүжигчдээр хязгаарлагддаг байсан дүрийг өөр олон үндэстэн жүжигчдэд нээлтэй болгосон ба Тинкер Беллийн дүрийн шалгаруулалтад мөн адил Дисней компани болон найруулагч Дэвид Лоури нар гол үүрэг гүйцэтгэсэн гэж мэдэгдээд байна. 

Яра Шахиди нь Америкийн ABС-ээр гарсан “Black-ish” киногоор олонд танигдсан. Тэрээр шүтэн бишрэгчдийнхээ хайраар “Grown-ish” киноны  гол дүрийг дахин бүтээсэн байна.

“Peter Pan & Wendy” киноны найруулагчаар Дэвид Лоури ажиллахаар болсон ба Питер Пений дүрд Александр Молони, Вендигийн дүрд Эвер Андерсон сонгогджээ. Мөн Ахмад дэгээгийн дүрд Жүүд Лоу тоглохоор болсон байна.  

Зургийн эх сурвалж: Disney