“Black Widow” киноны трэйлер цацагдлаа. Таскмастер гэж хэн бэ?
2020-03-20 11:51:34
“Black Widow” киноны трэйлер цацагдаж, олон үйл явдлын таамаг үлдээв.
“Black Widow” кино бол Авенжерсийн гишүүн Black Widow буюу Наташа Романофф(Скарлетт Йоханссон)-ийн тухай өгүүлэх анхны соло кино бөгөөд тэрээр “Marvel Cinematic Universe(MCU)”-ийн анхны эмэгтэй баатар билээ. “Black Widow” кино нь “Ахмад Америк: Иргэний дайн(2016)”-аас “Авенжерс: Цаглашгүй дайн(2018)”-ын хүртэлх түүний талаар бидний мэдэхгүй өнгөрсөн үеийн тухай өгүүлэх аж.
Тус трэйлерт Наташа хуучны хамтрагч Елена Белова(Флоренс Пью)-г зорин очдог. Елена нь Наташатай адил Улаан Өрөө байгууллагад бэлтгэгдсэн нэгэн. Наташа түүнд “Авенжерсэд нэгдэхийн өмнө маш олон буруу зүйл хийж байсан” гэж сэтгэлээ уудалдаг.
Төд удалгүй “Black Widow” киноны эсрэг дүр Таскмастер гарч ирдэг. Таскмастер “Ахмад Америк” шиг бамбай барьсан, бүх биеэ халхалсан хуягт хувцастай ажээ. Тэрээр юмыг ганцхан хараад л сайтар тогтоон биелүүлдэг чадвартай нэгэн аж. Эх зохиол комикт Улаан өрөөний бэлтгэсэн хорт этгээд Айрон Мейден байсан Мелина Востокофф(Рэйчел Вайс) “Black Widow” кинонд Наташатай хамтрагч болсноор Таскмастер биш байгаа гэсэн эргэлзээг төрүүлдэг. Гэвч Мелина трэйлерт Таскмастертэй нэгэн зэрэг гарч ирдэг нь түүнийг Таскмастер байх магадлалыг бууруулсан.
Авенжерсийг эсэргүүцэгч Таддеус Росс(Уильям Хёрт) нь Наташаг мөрддөг өөр нэгэн хүчтнээр гарч ирдэг. Өмнө нь “MCU”-ийн цувралд Халк, Авенжерстэй зөрчилдөж байсан Таддеус Росс эх комикт Улаан Халк болж Таддеус багийг үүсгэн байгуулдаг. “Black Widow” кинонд Таддеус Росс нь Улаан Халк болох нь тодорхой биш боловч, “Дисней плас”-аас бүтээх “She-Hulk”-д Улаан Халк гарч ирдэг гэсэн дам яриа тараад байгаа.
Скарлетт Йоханссон 2010 онд “Төмөр хүн 2” кинонд анх тоглосноос хойш 10 гаруй жил “MCU”-д Black Widow дүрээр амьдарчээ. “Black Widow” кино нь “Авенжерс: Эцсийн Тулаан(2019)” кинонд ямар ч бэлтгэлгүй хагацан одсон Наташагийн дотоод мөн чанар, түүний бидний мэдэхгүй олон зүйлсийн учрыг тайлсан кино болох бололтой.
Зургийн эх сурвалж: Disney
