BTS хамтлаг Саудын Арабын цээрийг эвдлээ

2019-11-05 06:31:01

Нүүр царай, гарын сарвуу, хөлийн тавхайнаас бусдыг халхалсан хар хувцас абаяа өмссөн эмэгтэй үзэгч нар 3 цаг тоглолт үзэхдээ гартаа барьсан хөгжөөн дэмжигчдийн гэрэлт савааг хөдөлгөн харанхуй цэнгэлдэх хүрээлэнг гэрэлтүүллээ. 

10 сарын 11-нд Саудын Арабын нийслэл Эл-Рияд хотын Кинг-Фад цэнгэлдэх хүрээлэнд BTS хамтлагийн Idol дууны ая явж эхэлмэгц үзэгчид үүнийг л хүсэн хүлээж байсан мэт “түрэн дуулж” угтлаа. Тэд “BTS!” гэж орилж хашхирч, дууг нь даган дуулж бүжиглэж байлаа. 

Исламын шашны хатуу дэг жаягаар абаяа өмссөн бол чанга дуугарахыг хориглодог. Гэтэл Саудын Арабын эмэгтэй үзэгч нар энэ өдөр цэнгэлдэх хүрээлэнд BTS хамтлагийг хэр их шүтэн биширдгээ харууллаа. Хэдхэн жилийн өмнө л  гэхэд олон нийтийн газар бүжиглэхийг ч хориглодог байсан араб эмэгтэйчүүдийн хувьд цээрээ эвдэж байгаа нь нэгийг өгүүлнэ. Тоглолт болсон Кинг-Фад цэнгэлдэх хүрээлэнд 2017 он хүртэл эмэгтэйчүүдийг оруулдаггүй(эмэгтэйчүүд хөл  бөмбөгийн тэмцээн үзэх эрхгүй) байжээ.

BTS хамтлаг Саудын Арабын 30 мянга гаруй хүний багтаамжтай том цэнгэлдэх хүрээлэнд гадаадын дуучид хамтлагаас хамгийн анх ийнхүү тоглолтоо хийлээ. BTS хориг хаалттай Арабын соёлын саад тотгорын үүдийг алгуурхан нээлээ. Багийн гишүүд долуулаа хэт задгай биш хувцас өмсжээ. Угтаа Fake love дууны дахилтыг дуулж бүжиглэхдээ хэвлийн булчингаа харуулцгаадаг боловч энэ удаа харуулсангүй. Очсон газар орныхоо соёлд тааруулж хувцаслаж, бүжгээ өөрчлөн дэглэжээ.

Энэ тоглолт нээлттэй байж, шинэчлэлийг эрэлхийлэх гэсэн Саудын Арабын хөгжлийн шинэ алхамтай яв цав нийцсэн гэж болно. Мухаммад бин Салман хунтайжийн хэрэгжүүлж байгаа нийгэм, эдийн засгийн өөрчлөлт шинэчлэлийн хөтөлбөр “Хэтийн зорилт 2030”-ын нэг хэсэг нь энэ байлаа. Тэд зөвхөн газрын тосонд дулдуйдахгүйгээр аялал жуулчлал тэргүүтэй бусад салбараа хөгжүүлж үйлдвэрлэлийн бүтцээ олон талтай болгохыг оролдож байгаа билээ. Ингэхдээ Саудын Арабын засгийн газар урлаг соёлоор аялал жуулчлалыг нэмэгдүүлэхийн тулд BTS хамтлагийн тоглолтыг зөвшөөрчээ. BTS-ийн тоглолтоос хагас сарын өмнө буюу 9 сарын 27-ноос жуулчны виз олгохыг ч зөвшөөрсөн байна. BTS Саудын Араб орныг үүд хаалгаа нээхэд анхны чухал үүрэг гүйцэтгэж чадлаа.