Найруулагч Тодд Филлипс: Жокерын шинэ анги хийнэ гэсэн мэдээ худлаа

2019-11-23 17:47:53

Найруулагч Тодд Филлипс 11 сарын 21-нд IndieWire -т өгсөн ярилцлагадаа “Жокерын шинэ ангийг хийж, гол дүрд Хоакин Фениксийг тоглуулна гэсэн мэдээ худлаа” гэж хэлжээ. 

Америкийн оддын мэдээллийн The Hollywood Reporter 11 сарын 20-нд Warner Brothers Жокерын шинэ анги хийх нь тодорхой болж, найруулагч Тодд Филлипс, зохиолч Скотт Сильвер нар санаа нийлэн, жүжигчин Хоакин Феникс бас дахин тоглохоор яригдаж байна гэж мэдээлсэн билээ. 

Тус мэдээнд найруулагч Тодд Филлипсийг Жокероос гадна DC комиксын бусад дүрүүд хэрхэн бий болсныг ч харуулах сонирхолтой байгаа гэж бичжээ. Тэгээд DC-ийн шүтэн бишрэгчид Жокерын дараагийн ангид Бэтмэний тухай оруулаасай гэсэн хүсэлтэй байгааг бас уламжилсан байна.

Харин найруулагч Тодд Филлипс “Одоогоор Жокерын шинэ ангийн талаар юу ч яригдаагүй”, “Ямар ч гэрээ хийгдээгүй. Хоакин Феникстэй ч энэ талаар уулзаагүй" гэжээ.

Бас "DC-ийн өөр дүрүүдийн талаар кино хийе ч гэж хэлээгүй”, “The Hollywood Reporter –ын мэдээ таамаг төдий” гэж тайлбарлав. 

Найруулагч “Жокерыг анхнаасаа нэг л анги хийх бодолтой байсан. Дараагийн ангийг гаргах байлаа гэхэд урлаг талаасаа эхний ангиа давж чадах уу гэдэгт итгэлтэй болсон үедээ л хийнэ" гэсэн байна.

Жокер кинонд DC комиксын дүрүүдийн нэг Жокер яаж бий болсныг өгүүлсэн бөгөөд, жүжигчин Хоакин Фениксийн ачаар комиксоос сэдэвлэсэн кинонуудаас анх удаа Венецийн кино наадмын Алтан арслан шагнал хүртсэн билээ. Үүний зэрэгцээ R зэрэглэлийн киноноос ч анх удаа 1 тэрбум долларын ашиг олсон амжилт гаргасан юм. 

Зургийн эх сурвалж: Warner Brothers