Star Trek 4 гарахаар болжээ
2019-11-27 16:43:10
Star Trek зөгнөлт киноны 4-р анги гарах нь тодорхой болжээ.
11 сарын 20-нд Америкийн Variety болон бусад сайтуудад “Lucy in the Sky” киноны найруулагч Ноа Хоули Star Trek 4-ийн зохиолч, найруулагчаар ажиллах болсныг мэдээллээ. 2016 онд гарсан Star Trek Beyond-оос хойш 3 жилийн турш завсарласан тус цуврал үргэлжлэх эсэх нь тодорхойгүй байсан бөгөөд нааштай хариу гарсан нь энэ.
2009 онд анх гарсан тус цуврал Жэй Жэй Абрамсын найруулгаар 1-р анги Star Trek: The Beginning, 2-р анги Star Trek Into Darkness хоёулаа амжилт олжээ. Гол дүр Крис Пайн, Зои Салдана, Саймон Пегг, Закари Куинто, Жон Чо нараас гадна Вайнона Райдер, Бенедикт Камбербэтч, Крис Хемсворт нарыг нэртэй жүжигчид болоход энэ цуврал нэмэр болсон нь дамжиггүй.
Амжилттай явж байсан цувралын 3-р анги Star Trek Beyond тун тааруухан болж нэг хэсэг тасалдсан билээ. Шалтгааныг нь олон бишрэгчтэй Ж.Ж.Абрамс найруулагч киног найруулахаа больж зөвхөн продюсерлох болсонтой холбон тайлбарладаг. Ж.Ж.Абрамсын оронд Жастин Лин найруулагч киноны уур амьсгалыг ихээхэн өөрчилж үзэгчдийн урмыг хугалсан гэдэг.
Бас Павел Чеховын дүрд тоглосон жүжигчин Антон Ельчин 2016 онд зам тээврийн ослоор нас барж кино багийнханд том гарз тохиожээ. Чухал дүрийн жүжигчин зуурдаар нас барж, 3-р анги нь бүтэлгүйтсэн цувралыг цаашид үргэлжлэхгүй байх гэсэн таамаг гарч байв.
Гэтэл 2017 онд 4-р ангийн талаар дахин яригдаж эхлэв. Жүжигчид ч цуглаж MCU Торрын дүрээр нэр алдраа дуурсгаж байсан Крис Хемсворт хүртэл тэдэнтэй хамтарна гэлцэх болсон ч Парамаунт студи төсөв дээр гар татсанаар Хемсвортоос гадна гол дүр Жэймс Киркийн дүрд тоглосон Крис Пайн хүртэл тохиролцолгүй больж байгаа гэж дуулдсан. 3-р ангийн бүтэлгүйтэл, төсөв мөнгөний гачаалын сацуу жүжигчид нэрээ татсан нь цуврал үргэлжлэх ямар ч найдлагагүй болжээ гэсэн сэтгэгдэл үлдээв.
Харин Парамаунтаас найруулагч Ноа Хоулиг найруулагчаар ажиллах болсныг мэдэгдсэнээр цуврал замхраад дуусахгүйг нотоллоо. Крис Пайн 4-р ангид тоглохоор болсон нь нас барсан Антон Ельчинээс бусад жүжигчдийг дахин нэгдэхэд хүргэжээ.
Киноны нээлт хараахан товлогдоогүй байна.
