Том Холландын дуу оруулсан сэтгэл татам дүрүүд
2019-12-22 20:03:46
MCU Хүн аалзын дүрээр нэр нь түгсэн Том Холланд сонсголонтой дуу хоолойгоороо үзэгчдийн сонорыг мялаах гэж байна.
2020 оны эхний хагаст л гэхэд 3 кино нь дэлгэцнээ гарна.
1. Зүсээ Хувиргасан Тагнуулчид
2020 оны 12 сарын 27-нд дэлгэцнээ гарах "Зүсээ Хувиргасан Тагнуулчид" тулаант кинонд тагтаа болсон тагнуулын супер ажилтан, Массачусетсийн технологийн сургуулийн төгсөгч оюутан нар дэлхийг аврахын тулд багаар ажиллаж байгааг өгүүлнэ. Том Холланд Вилл Смиттэй хамт гол дүрээр сонгогджээ. Вилл Смит санамсаргүй байдлаар тагтаа болж хувирсан тагнуулын ажилтан Лэнс болно.
Харин Том Холланд 15-тайдаа технологийн сургууль төгсөж этгээд төсөөллөөрөө хачин жигтэй юмнууд зохион бүтээдэг супер ухаантан Уолтерын дууг оруулжээ. "Зүсээ Хувиргасан Тагнуулчид" киноны Уолтер хайртай хүнээ аварч дэлхийг аврах хүсэлтэй өсвөр насны хүү. Угаас “гавал” төрсөн болохоороо тагнуулын янз бүрийн зэвсэг зохион бүтээж суут санаа сэднэ. Тэрээр тагнуулч Лэнстэй хэрхэн санаа нийлж ажиллаж байгаа нь MCU Питер Паркер “хамраа сөхчихсөн” тэрбумтан Тони Старктай анх уулзаж байсан мөчийг эрхгүй санагдуулна. Том Холланд адал явдалд бэлэн Уолтерын дууг амьд сайхан оруулжээ.
2. Дүлитл
2020 оны 1 сарын 17-нд нээх Дүлитл(найруулагч Стивен Гаген) кинонд амьтадтай хэл амаа ололцдог гоц чадвартай Дүлитл эмч (Робер Дауни Жуниор) аюул нүүрлэсэн хаант улсыг аварч байгааг харуулна. Роберт Дауни Жуниор, Том Холланд нарыг Төмөр хүн, Хүн аалз нар гэдгийг та бүхэн хэнээр ч хэлүүлэлтгүй мэднэ.
Том Холланд, Дүлитл эмчтэй замд гарах Жип нохойны дүрд дуу оруулж байгаа. Хэтийдсэн ер бусын чадвартай Дүлитлд ч саад бэрхшээлийг давж гарахад туслах анд нөхөр хэрэгтэй. Жип ямар ч нөхцөлд Дүлитлийг орхидоггүй үнэнч нохой. "Авенжерс: Эцсийн Тулаанд" Төмөр хүнийг хамгаалах гэсэн Хүн аалзтай адил өчнөөн олон аюул бэрхшээлийн дунд ч эзнээ хамгаалдаг. Жипийн хөөрхөн төрх, Том Холландын увдист хоолойтой хэрхэн зохицохыг тун удахгүй үзээрэй.
3. Урагшаа
"Урагшаа" кинонд эвтэй найртай элф ах дүүс олон жилийн тэртээ тэнгэрийн оронд одсон аавынхаа төлөө аян замд гарч байгааг өгүүлнэ. Энэхүү сургамж дүүрэн гэр бүлийн киноны гол дүр ах дүүс санаа сэтгэл нэгдэн аавынхаа үлдээсэн гэрээслэлийг биелүүлнэ. Луу, шидэт таяг, ганц эвэрт гарч, ид шидийн ертөнцөд аваачих сонирхолтой бүтээл.
Том Холланд адал явдал туулах дүү элф Ианы дууг оруулна. "Галактикийн Хамгаалагчид" (найруулагч Жэймс Ганн) киноны Старлордын дүрд тоглосон жүжигчин Крис Прэтт бас энэ кинонд дуу оруулна. Аль аль нь MCU баатруудынхаа дүрүүдтэй төстэй. Цовоо цолгиун Старлорд(Крис Прэтт) барагтай юмнаас буцдаггүй элф ах Барли, харин анхны хайраа ч олигтойхон илчилж чаддаггүй "Хүн Аалз(Том Холланд)" юм болгоноос хойш суудаг, бүрэг ичимтгий элф дүү Ианы дууг оруулна. "Урагшаа" 2020 оны 3 сард дэлгэцнээ гарна.
Зургийн эх сурвалж: 20th century fox, Universal pictures, Disney
