Том Круз “Топ Ган 2” кинонд ахин тоглолоо
2019-12-23 22:51:47
12 дугаар сарын 15-ны өдөр Том Круз болон “Парамаунт Пикчерс" албан ёсны олон нийтийн сүлжээ хаягаараа “Топ Ган 2” киноны шинэ постер, трэйлерийг цацаж, “Топ Ган: Маверик” киногоо танилцууллаа.
“Топ Ган” кино бол Холливудын од жүжигчин Том Крузд нэр хүнд авчирсан бүтээл бөгөөд 1986 онд анх олны хүртээл болж байжээ. Тони Скотт найруулагчаар нь ажиллаж, 15 сая долларын төсөвтэйгөөр бүтээгдэж Умард Америкт 170 сая доллар, дэлхий дахинаас 350 сая гаруй долларын орлого олж байсан бүтээл билээ.
Өмнөх цувралд Америкийн тэнгисийн цэргийн супер F-14 байлдааны онгоцны нисгэгчийг бэлтгэн гаргадаг “Топ Ган” сургуульд элсэн орсон нисгэгч “Маверик(Том Круз)” хамтрагчаа зуурдаар алдаж, сэтгэлээ хатуужуулан шилдэг нисгэгч болж байгаа тухай өгүүлдэг.
“Топ Ган” киноны “Take My Breath Away” дуу тэр жилдээ “Academy Awards”, “Golden Globe Awards” –аас “киноны дуу” шагналыг хүртэж, “Биллбоард”-ын жагсаалтын 1-т бичигдэж, цомог нь 9 сая ширхэг борлогджээ.
Тухайн үед Том Крузын нарны шил зүүн, нисгэгчийн хүрэмтэйгээр мотоцикл унадаг дүр төрх нь дэлхий дахины шүтэн бишрэгчдийн сэтгэлийг гэгэлзүүлж байсан.
34 жилийн дараа эргэн ирж байгаа “Топ Ган” киноны үргэлжлэл “Топ Ган: Маверик”-т 1-р ангидаа нас барсан “Goose” (Энтони Эдвардс)-ийн хүү “Bradley”(Майлс Теллер) -ийн сургагч багш “Маверик” (Том Круз) нарын тухай өгүүлэх ажээ.
1-р ангид Мавериктай нэг зэрэглэлд байсан “Iceman” Вал Килмер эргэн ирж, Эд Харрис Маверикийн даргын дүрд тоглосон байна. Мөн Женнифер Коннелли , Том Крузтай хайрын романс үүсгэх шинэ дүрийг бүтээх ажээ.
“Oblivion”, “Tron Legacy” киног найруулсан Жозеф Косински найруулагчаар нь, Жерри Брукхаймер продюсероор нь ажиллажээ. Том Крузтай “Mission: Impossible” кинонд хамт ажилласан найруулагч Кристофер Маккуорри эх зохиолыг нь бичжээ.
Орлон тоглогчгүйгээр тулалдах хэсэгтээ өөрөө шууд тоглодог Том Круз “Топ Ган: Маверик” киногоор үзэгчдийг хэрхэн алмайруулах бол гэсэн хүлээлтийг үүсгээд байна.
Тус кино ирэх жилийн 6 дугаар сарын 26-ны өдөр нээлтээ хийнэ.
