Марвелийн дараагийн бүтээл, хамгийн романтик WandaVision кинонд юуны тухай гарах вэ?
2019-12-29 00:16:38
Умард Америкт стрийминг үйлчилгээгээ эхэлсэн Дисней пласынхан шуугиан тарьсаар байна. Дисней дангаараа гаргах контентуудаас ялангуяа MCU" -ийн баатруудын гол дүрүүдээр тусгай цувралууд гаргаж байгаа нь хамгийн ихээр анхаарал татаж байгаа билээ. Удахгүй бүтээгдэх MCU -ийн кинонууд нэгэнт дууссан Авенжерс цуврал(2012-2019)-ыг үгүйлсэн үзэгчдийн сэтгэлийг дэвтээх нь дамжиггүй.
Дисней пласаас барих анхны бэлэг MCU цуврал WandaVision 11 сард зураг авалтаа эхэлжээ. WandaVision бол Авенжерсын хос Скарлет Вич(Элизабет Олсен), Вижен(Пол Беттани) нарын түүхийг өгүүлэх цуврал.
Скарлет Вич, Вижен хоёр "Авенжерс: Цаглашгүй Дайн" ангид хагацсан хос. Харин энэ удаагийн цуврал WandaVision 1950-аад оны инээдмийн цуврал маягийн цоглог кино болох сурагтай. Марвелийн эзэн Кевин Файги 7 сард American Comic Con 2019-ийн үеэр хэлэхдээ WandaVision 1950-аад оны үйл явдлыг харуулах цаг хугацааны аялал хийх уянгын цуврал болно” гэжээ. "Авенжерс: Эцсийн Тулаан(2019)" -ээс хойших цаг хугацааг харуулахад "Авенжерс: Цаглашгүй Дайн" дээр үхсэн Вижен яаж гарах нь сонирхол татна.
Скарлет Вич, Вижен хоёрын хайр дурлал дэндүү богинохон байсанд харамсаж байсан фэнүүддээ зориулж WandaVision хайр дурлалыг хангалттай сайн харуулах аж. Гэхдээ зөвхөн хайр дурлалдаа умбасаар дуусах уу гэвэл мэдээж үгүй. Марвелийг төлөөлөх хоёр баатар маань гол дүрүүд болж байгаа болохоор Марвелийн өмнөх кинонуудын өнгө аяс, баатарлаг үйлс үргэлжилж таарна. "Авенжерс: Эцсийн Тулаан" дээр л гэхэд Ванда Максимофф хэмээх жинхэнэ нэрээрээ гарсан Скарлет Вич яаж баатрын нэр авсныг ч цувралаас үзэх боломж гарч магадгүй юм. Кевин Файги “Таносоос хүчтэй” гэж үг цухуйлгасан Скарлет Вич WandaVision цувралд ямар сорилт бэрхшээлийг даван туулах бол?
Түүнчлэн WandaVision цуврал нь Марвелийн кинотой шууд холбоотой агуулгыг харуулах тул бусад цувралаасаа ялгарна гэж үзэж байна. Бас 2021 онд нээлтээ хийх төлөвлөсөн MCU-ийн "Doctor Strange in the Multiverse of Madness" киноны агуулгад нөлөөлөх юм байна. Энэ мэдээ тарснаас хойш Доктор Стрэйнж(Бенедикт Камбербэтч) WandaVision цувралд Камеогийн дүрээр гарна гэх таамаглал гарсан. Скарлет Вичийн дүрд тоглох Элизабет Олсены хувьд "Doctor Strange in the Multiverse of Madness" кинонд тоглох нь тодорхой болсон байгаа.
Одоогоор WandaVision цувралд тоглох MCU-ийн дүр гэвэл "Ахмад Марвел" -д гарсан Моника Рамбо(Тейона Паррис) байна. Моника Рамбо Ахмад Марвелийн дотны найз Мариа Рамбогийн охин болж гарна. Мөн "Thor" цувралд тоглосон Дарси Льюис(Кэт Деннингс), "Хүн Шоргоолж 2" киноны багийн гишүүн Жимми Вүү(Рэндалл Парк) нар тоглохоор болжээ. Хоорондоо холбоогүй байсан MCU-ийн туслах дүрүүд WandaVision цувралд хэрхэн холбогдохыг бушуухан үзэх юмсан.
WandaVision 2021 оны хавар Дисней пласаар гарч эхэлнэ.
