SMCU(Sony Marvel Cinematic Universe) тойм
2020-01-16 12:36:51
“Сони Пикчерс” компани “Морбиус”, “Веном 2” кинонуудын нээлтийн өдрийг тодорхой болгожээ. “Морбиус”, “Веном 2” бол киноны эх зохиол комикт Хүн Аалзны эртний дайсан болох эсрэг дүрүүд юм.
"SMCU" -ийн энэ жилийн олны хүртээл болгох эхний кино бол 7-р сарын 31-ний өдөр нээлтээ хийх “Морбиус” юм. Уг киноны эх зохиол “Гайхамшигт Хүн-Аалз” комикт гардаг цус сорогч бөгөөд эхний бүрэн хэмжээний уран сайхны кино болон бүтээгдэж байгаа билээ. Эх зохиолд Морбиус бол Нобелийн шагналдаа урамшсан чадварлаг эрдэмтэн хэдий ч, цусны ховор өвчнөө анагаах зорилгоор цус сорогч сарьсан багваахайн эсийг шилжүүлэн суулгах туршилт хийн цус сорогч болдог. Түүний улмаас аллага үйлдэх хүслээ дарж чадахгүй буг чөтгөр болж хүн аалзтай тулалддаг.
“Морбиус”-ын дүрийг жүжигчин Жаред Лето бүтээжээ. 2016 онд олны хүртээл болсон “Үхлийн Салаа” кинонд жокерын дүрийг бүтээсэн тэрээр тэс өөр дүрийг бүтээх ажээ. Морбиусын найз бүсгүй хийгээд мөн цус сорогч Мартина Бэнкрофтын дүрийг “Номхон Далайн Хөвөө: Бослого”, “6 underground” кинонд тоглосон жүжигчин Адриа Архона бүтээсэн байна. Морбиусын дайсан болох өөр нэгэн эсрэг дүр Локсиас Крауны дүрийг Мэтт Смит бүтээнэ. Тус бүтээлд Локсиас Краун Морбиустай үй зайгүй найзууд байсан ч ижил туршилтаар цус сорогч болж, аллагын талаарх ёс суртахууны хэм хэмжээний улмаас Морбиустай зөрчилдөх ажээ.
“Морбиус”-аас дутахааргүйгээр шүтэн бишрэгчдэдээ хүлээлт үүсгээд байгаа “Веном” киноны 2 дахь цуврал 10-р сарын 2-ны өдөр нээлтээ хийхээр болжээ. 2018 онд олны хүртээл болсон “Веном” киног дэлхийн кино шүүмжлэгчид хатуу шүүмжилж байсан хэдий ч, дэлхий дахинаас 855 сая долларын орлого олж, кино төсвөөс 8.5 дахин их орлого олсон амжилтыг авчирчээ.
Өмнөх цувралд дараагийн ангийг танилцуулах бичлэгээр жүжигчин Вүүди Харрельсон шинэ дүр Карнажийг бүтээж буй тухай гардаг. Карнаж нь аллага гэсэн утгатай. Тус эсрэг дүр нь Веномтой адил харь гарагийн амьд биет симбиотоос бий болсон ба илүү хүчтэй. “Веном 2” кинонд Веном өөрийн дайсан Карнажтай тулалддаг. 2019 оны 10-р сард “Марвел” студи тус кинонд эмэгтэй эсрэг дүр Шриек гарах талаар дурдаж байсан ба Шриек, Карнаж хоёрын хайрын романсын талаар өгүүлэх ажээ.
Шриекийн дүрийг Наоми Харрис бүтээнэ. Хүн аалзаар “MCU” -т улаан шугамаар эрч хүчтэй яваа жүжигчин Том Холланд тус кинонд тоглоно гэсэн яриа газар авч, шүтэн бишрэгчдийн дунд шуугиан тарьж байгаа ч, “Сони Пикчерс” компаниас өнгөрөгч 3-ны өдөр киноны мэргэжлийн “discussing film” сайтад “no comment” гэсэн хариу өгч Том Холланд тус кинонд туслах дүрийг бүтээх эсэх талаар тодорхойгүй байна.
“Веном 2” киноны найруулагчаар жүжигчин, найруулагч Энди Серкис ажиллана. Веномын дүрийг бүтээсэн жүжигчин Том Харди эх зохиолыг бичихэд мөн оролцсоноор эртнээс ярианы сэдэв болоод байна.
