Билли Айлиш "007: ҮХЭХ Ч ЗАВГҮЙ" киноны дууг дуулжээ
2020-01-17 16:36:20
“007: ҮХЭХ Ч ЗАВГҮЙ” киноны дууг амилуулсан дуучин ил боллоо.
Тус дуучин нь 2001 онд төрсөн уран бүтээлч бөгөөд дууны үгээ өөрөө зохиож эвлэгхэн хоолойгоороо олонд танигдсан дуучин Билли Айлиш юм. Билли Айлиш болон түүний төрсөн ах Финнеас О’Коннеллтой нар хамтран “007: ҮХЭХ Ч ЗАВГҮЙ” киноны дуун дээр ажиллажээ.
007 цувралын ахлах продюсер Барбара Брокколли болон Майкл Ж. Вилсон нар "Бид ах дүү хоёрыг "007: ҮХЭХ Ч ЗАВГҮЙ" кинонд хөг нэмж төгс хамтарч ажилласанд баяртай байна. Кино маань итгэхийн аргагүй тод, мартагдашгүй дуутай болж байгаад баяртай байна" гэж мэдэгджээ.
Мөн найруулагч Кэри Фүкүнага "Би ч гэсэн тэдний улаан фэн. Ах дүү хоёрын авьяас чадвар, онгод бүтээл нь хэнээс ч дутахгүй. Тэдний хоолой магадгүй хойч үеийнхэнд хүргэх дохио болж, шинэ өөрчлөлт, шинэ санааг ч төрүүлж болох юм" гэж сэтгэгдлээ илэрхийлжээ.
Дуучин Билли Айлиш “007 цуврал бидний мэдэх хамгийн гайхалтай цуврал. Энэ цувралын дууг дуулах болсондоо одоо ч итгэхгүй байна. Шокноосоо гараагүй л яваа" гэжээ.
Ах Финнеас О’Коннелл 007 цувралын дууны үгийг бичнэ гэдэг миний мөрөөдөл байлаа. Бид дэлхийн хамгийн шилдэг, домогт цувралын шинэ анги “007: ҮХЭХ Ч ЗАВГҮЙ” киноны дуун дээр хамтран ажилласан нь үнэхээр их аз завшаан" гэв.
Билли Айлиш 2016 онд "Ocean Eyes" хэмээх дуугаараа тайзанд анх гарч, 2019 онд "Bad Guy" дуугаараа дэлхий дахинд танигдаж цойлон гарч ирсэн юм. Биллбоардын сингл чарт жагсаалтад тэргүүлж, 62 дахь удаагийн Грэммийн шагналд Оны шилдэг цомог, Оны шилдэг дуу гэх мэт нийт 6 ангилалд нэр дэвшжээ.
Дуучин, ая зохиогч Финнеас О’Коннелл нь продюсер, жүжигчнээр ч ажилладаг. Олон сингл дууныхаа ихэнхийг нь өөрөө зохиожээ.
“007: ҮХЭХ Ч ЗАВГҮЙ” кинонд Жэймс Бонд(Даниэл Крейг) Америкийн Тагнуулын Алба(CIA)-ны найз Феликс Лейтер(Жеффри Райт)-тэй цуг Ямайкад амарч байтал, хулгайлагдсан эрдэмтнийг аврах тусгай даалгавар ирж нууцлаг этгээд(Рами Малек)-ийн эсрэг тэмцэж байгааг өгүүлнэ.
Даниел Крейг, Рами Малек, Лашана Линч, Леа Сейду, Бен Уишоу, Ана де Армас, Наоми Харрис, Рэйф Файнс нарын тоглосон тус кино 4 сарын 10-нд нээлтээ хийнэ.
