Молли Фицжеральд “Ээж эхлээд намайг алах гэсэн" гэжээ
2020-01-18 13:09:30
Марвел студийн “Ахмад Америк” цувралд тоглосон Холливудын жүжигчин Молли Фицжеральдийг хүн амины хэргийн сэжигтнээр хавтаст хэрэг үүсгэжээ.
The Hollywood Reporter гэх мэт мэдээллийн хэрэгслээр "Молли Фицжеральд Канзас мужийн захад оршин суудаг гэртээ, төрсөн ээжийнхээ амийг хөнөөсөн хэрэгт сэжиглэгдэн, шоронд хоригдлоо" гэсэн мэдээ цацагдав.
TMZ сайт "Молли Фицжеральд аргагүй хамгаалалт хэрэглэсэн гэж мэдүүлжээ. Гэвч цагдаагийнхан түүнийг эхэлж дайрсан гэж үзэж байна" гээд, "Цагдаад өгсөн мэдүүлгээс нь үзвэл, Моллигийн ээж эхлээд хутга барьж дайрсан учраас аргагүйн эрхэнд ээжийнхээ аминд хүрсэн гэж мэдүүлсээр байгаа ажээ" гэсэн байна.
Задлан шинжилгээний хариунаас үзэхэд “аргагүй хамгаалсан” хүн нь Молли биш ээж нь байж таарчээ. Эхийнх нь хоёр гар дүүрэн шарх, хүзүү нүүр нь ч хөхөрсөн байсан тул цагдаагаас Моллиг эхэлж дайрсан гэж үзэж хэрэг үүсгэжээ.
Молли Фицжеральд найруулагч, жүжигчин бөгөөд, найруулагч Жо Жонстоны туслахаар ажиллаж байжээ. “Ахмад Америк: Анхны өшөө авагч” киноны Старк Гёрлын дүрээр нь хүмүүс мэднэ.
