“Black Panther” киноны найруулагч “Чадвик Боузманыг хорт хавдартай тэмцэж байсныг мэдээгүй... Нуун зураг авалтаа дуусгажээ”

2020-09-03 10:14:30

Жүжигчин Чадвик Боузман 8-р сарын 28-ны өдөр бүдүүн гэдэсний хорт хавдраар хорвоог орхижээ. 2016 онд бүдүүн гэдэсний хорт хавдрын 3-р үе гэж оношлогдон өвчинтэйгөө тэмцсээр ирсэн байна. “Black Panther” киноны найруулагч Райан Куглер зураг авалтын үеэр Чадвик Боузманыг хорт хавдартай тэмцэж байсныг мэдээгүй байсан гэж мэдэгджээ. 8-р сарын 30-ны өдөр Америкийн “The Hollywood Reporter” зэрэг хэвлэл мэдээллийн олон сайтууд Райан Куглер найруулагчийн Чадвик Боузманд зориулсан гүн эмгэнэлийн үгсийг нийтэд дэлгэсэн байна. 

Үүнд “Талийгаачийн гэр бүлийнхэн түүний өвчний талаар нийтэд дэлгэхэд, би түүнийг мэддэг байсан бүхий л хугацаанд тэр өвчинтэйгөө тэмцэж байсан байжээ.” гээд “Тэр бол сайн эцэг, сайн удирдагч байсан. Сүсэг бишрэлтэй, соёлтой, өөртөө итгэлтэй нэгэн байсан учраас хамтран ажиллаж бид өвчтэй гэдгийг нь анзаараагүй байх.” гэж хэлсэн байна. Улмаар “өдрөөс өдөрт, жилээс жилд түүнд байсан бүхий л хугацаандаа тэрээр гайхалтай сайхан амьдралаар амьдарч, гайхамшигтай уран бүтээлд өөрийгөө мөнхөлсөн.” хэмээжээ. Түүнчлэн “талийгаач веган хооллолтын арга, цар тахлын үеэр надад болон гэрийнхэнд минь хоолны жор илгээж байсан. Тэрээр өөрөө хорт хавдартай тэмцэж байсан хирнээ надад болон хайртай хүмүүсээ халамжилж байсан” хэмээн түүнийг дурссан байна.  

Тэрээр 2003 онд “Third Watch” олон ангит киногоор жүжигчний карьераа эхлүүлжээ. “42” киногоор мэргэжлийн лигийн анхны өнгөт арьст тамирчин Жеки Робинсоны дүрээр олны танил болсон байна. Ялангуяа “Марвел”-ын “Ахмад Америк: Иргэний дайн”(2016), “Авенжерс: Цаглашгүй дайн”(2018), “Авенжерс: Эцсийн Тулаан”(2019) зэрэг кинонд тоглож байсан. 2018 онд “Black Panther” кинонд гол дүр T’Challa хааны дүрийг бүтээж байсан тус кино нь супер баатартай кинонуудаас хамгийн анх Оскар-2019 "Шилдэг Кино" төрөлд нэр дэвшиж байсан кино юм. T’Challa хааны зоригтой төрхийг харуулахын тулд дасгал сургуулилтад өөрийгөө бүрэн зориулж бие хаагаа бэлдэн төгс гэмээр “Black Panther”-ийн дүрийг бүтээсэн тэрээр тухайн үедээ хорт хавдартайгаа тэмцэж байжээ. Чадварлаг жүжиглэлт, сайн үйлсээрээ олны дунд үлгэр дуурайлал болсон жүжигчин байсан учир түүнийг гэсэн хамтран ажиллагч, шүтэн бишрэгчдийнх нь эмгэнэл тасрахгүй байна. 

Найруулагч Райан Куглер “Black Panther 2” киноны талаар дурдахдаа, “Өнгөрсөн жил би талийгаачийн хэлэх үгийг төсөөлөн “Black Panther 2” киноны зохиолыг бичсэн.”, “Дэлгэцээр талийгаачийг дахин харж болох хэдий ч, түүний өөр нэгэн шинэ дүр төрх, жүжиглэлтийг харах боломжгүй боллоо. Хэзээ ч ингэж гашуудаж байгаагүй. Дахин дүрсээ харж ярихгүй, мессеж бичихгүй гэж бодохоор л үнэхээр их харуусаж байна.” хэмээн дурджээ.