Коронавируст халдвар авсан Холливудын одууд Роберт Паттинсон ч бас...

2020-09-14 17:49:20

9-р сарын 3-ны өдөр Америкийн “Vanity Fair” болон өөр бусад орны хэвлэлээр Холливудын жүжигчин Роберт Паттинсон коронавируст халдвар авсан гэж мэдээлжээ. “The Batman” киноны зураг авалт түр зогссон ба “Warner bros” компанийн “The Batman” кино багийн гишүүн мөн адил коронавируст халдварын шинжилгээгээр эерэг гарсан тул тусгаарласан” гэж мэдээлсэн байна.  Тус кино нь 2020 оны 3-р сард коронавируст халдварын цар тахлын улмаас зураг авалтаа зогсоогоод байсан ба энэ долоо хоногт дахин зураг авалтаа зогсоож байжээ. 

Роберт Паттинсон ёс горимын дагуу тусгаарлагдан эмчлүүлж байгаа. Үүний талаар Роберт Паттинсон болон “Warner bros” компани тодорхой хариулт өгөхөөс татгалзаад байгаа аж. Холливудын жүжигчдээс анх Том Хэнкс коронавируст халдвар авсан. Тэрээр 2020 оны 3-р сард эхнэр Рита Уилсоны хамт коронавируст халдвар авч шүтэн бишрэгчдийнхээ санааг зовоогоод байсан. Тэрээр Элвис Преслигийн тухай киноны зурагт авалтаар эхнэртэйгээ хамт Австралид байсан байна. Түүнээс хойш жүжигчин Ольга Куриленко, Идрис Эльба, Дэниэл Дэ Ким, Рэйчел Мэтьюз ч бас 3-р сард коронавируст халдварын шинжилгээгээр эерэг гарсан ажээ.

2020 оны 9-р сарын 3-ны өдөр Холливудад орлогоороо 1-рт бичигдсэн жүжигчин Дуэйн Жонсон ч бас коронавируст халдвар авсан гэж мэдэгджээ. Тэрээр өөрийн инстаграм хуудсаар өөрийгөө болон эхнэр Лаурен, хоёр охин нь коронавируст халдвар авсан гэж мэдэгдсэн бөгөөд “Энэ бол манай гэр бүл болон миний тэсвэрлэн гарах ёстой хамгийн бэрх зүйл” гээд “Өмнө нь нүд халтирам бэртлийг даван гарч байсан боловч, коронавируст  халдвар үүнээс тэс өөр байна” гэж хэлжээ. Мөн тэрээр “Дархлаагаа сайжруул. Эрүүл мэндийнхээ төлөө маск зүүж, гэр бүлээ хамгаал” гэж захисан байна. 

Ихэнх жүжигчид коронавируст халдвар авсны дараа эмчлүүлж эдгэсэн боловч, шүтэн бишрэгчдээ таагүй мэдээ дуулгасан жүжигчин ч бас байлаа. “Desperately Seeking Susan” кинонд тоглосон жүжигчин Марк Блум 2020 оны 3-р сард коронавируст халдвар авсны дараа эмчилгээ хийлгэсэн боловч, хавсарсан өвчний улмаас хорвоог орхисон байна. 

Коронавируст халдвар авсан жүжигчид хурдан эдгэж, энх цаг хурдан ирэх болтугай. 

Зургийн эх сурвалж: Warner bros