Анхны Жеймс Бонд болох Шон Коннери таалал төгсжээ

2020-11-03 18:42:26

“007” цувралын анхны Жеймс Бондын дүрийг бүтээсэн жүжигчин Шон Коннери нь Бахам дахь өөрийн гэртээ таалал төгсжээ. Тэрээр гэр бүлийнхнийхээ асаргаанд унтаж байхдаа таалал төгсжээ. Шон Коннерийн хүү Жейсон Коннери “Бахамд цуглах боломжтой гэрийн бүлийн гишүүд аавын маань хажууд байсан. Аавд хайртай хүн бүхний хувьд гунигтай өдөр байлаа.” хэмээжээ. Шон Коннери 2020 оны 8-р сард 90 нас хүрсэн боловч төд удалгүй бие нь мууджээ. Түүний таалал төгссөнд олон хүмүүс гүн эмгэнэл илэрхийлээд байна. 

“007 Casino Royale”, “007 Quantum Of Solace”, “007 Skyfall”, “ 007 Spectre”, “007 No Time To Die” зэрэг кинонд Жеймс Бондын дүрийг бүтээсэн Даниел Крейг “Кино ертөнцийн жинхэнэ агуу од бөхжээ. Тэрээр үүрд мөнхөд Жеймс Бондоор мөнхрөн үлдэх болно” хэмээн эмгэнэл илэрхийлжээ. The World Is Not Enough”, “Tomorrow Never Dies” кинонуудад Жеймс Бондын дүрийг бүтээсэн Пирс Броснан “Та миний бага насны хамгийн агуу Жеймс Бонд байсан. Та бидний зүрх сэтгэлд үүрд мөнхөд үлдэх болно. Бид таныг мөнхөд дурсах болно. Тайван нойрсоорой.” хэмээн бичжээ.  Кино ертөнцийн төдийгүй түүний бүтээлд хайртай байсан дэлхийн дахины шүтэн бишрэгчид нь түүнд хүндэтгэл үзүүлэн гүн эмгэнэл илэрхийлсээр байна. 

Шон Коннери 1962 онд “007” цувралын анхны бүтээл болох “007 Dr.No” кинонд анхны Жеймс Бондын дүрийг бүтээжээ. Улмаар “007” цувралд “From Russia, With Love”, “Goldfinger”, “Thunderball”, “You Only Live Twice”, “Diamonds Are Forever”, “Never Say Never Again” гээд нийт 7 кинонд гол дүрийг бүтээн олны хайр хүндэтгэлийг хүлээсэн билээ. Тэрээр “The Hunt For Red October”, “The Rock”, “Indiana Jones and the Last Crusade”, “The Name Of The Rose”, “The Untouchables” зэрэг кинонд тоглож, тууштайгаар жүжигчний амьдралаар амьдарсан. “The Untouchables” киногоор Америкийн Академийн “шилдэг эрэгтэй” дүрийн шагналыг хүртсэн ажээ.