Хлоя Морец, “Том, Жерри хоёр”

2021-03-04 12:33:50

Дэлхий дахинаа мянга мянган үзэгчдийн хайр хүндэтгэлийг хүртсэн “өрсөлдөгчид” Том, Жерри хоёр, түүнчлэн Хлоя Морец нар нэгдэнэ.

“Том, Жерри хоёр” 1940 онд анх олны хүртээл болсноос хойш 80 жил өнгөрсөн ч өнөө хэр даян дэлхийн мянга мянган үзэгчдийн хайр хүндэтгэлийг хүртээд байгаа 20-р зууны шилдэг анимэйшн хийгээд үйл хөдлөлийн инээдмийн домог юм. 2021 оны бүрэн хэмжээний анимэйшний шинэ хувилбарт Нью-Йорк хотыг урьд хожид байгаагүй түйвээн бусниулах талаар өгүүлэх ажээ.

Цуутай хурим болохоор зэхэж буй Нью-Йорк хотын нэгэн дээд зэрэглэлийн зочид буудалд Жерри хулгана нүүн ирнэ. Харин түүнийг бариулахаар эвент зохион байгуулагч Каила(Хлоя Морец) муур Томыг хөлсөлнө. Гэвч төсөөлснөөс илүүтэйгээр хэрэг таригчид их үймээн тарьж, Каилагийн карьер төдийгүй хурим хийгээд зочид буудал хүртэл аюулд унана. “Том, Жерри хоёр” кино live-action болон computer graphics анимэйшн хосолсон гибрид кино бөгөөд дуу дүрсний гайхалтай хослолыг мэдрүүлэх ажээ. 

Гол дүр Том, Жерригээс гадна маш олон амьтад гарах ба Нью-Йорк хотын дээд зэрэглэлийн зочид буудалд олон сонирхолтой үйл явдлууд өрнөнө. Том, Жерри хоёрыг багадаа үзэж байсан тэр үеийн хөгжилтэй явдлыг тэр чигээр нь хүргэх ба Хлоя Морец, Майкл Пенья, Кен Жонг зэрэг Холливудын чадварлаг жүжигчид тоглосноор анимэйшнээс илүүтэй бодит кино юм шиг сонирхлыг татах аж.

Тус кинонд найзуудын үймээн самуунаас амьдралын талаарх жинхэнэ хандлагын үнэ цэнэ, нөхөрлөл, хамтын ажиллагааны чухал чанар хийгээд хэцүү даалгаврыг биелүүлэх гэж оролдох аз туршилт зэргийг шингээн тусгаж халуун дотноор гол санаагаа хүргэх ажээ. 80 жил олны хайр хүндэтгэлийг хүртэж ирсэн алдартай дайсагнал хийгээд шинэ найзуудын дотно нөхөрлөл нь тус киноны гол үйл явдал юм. 

“Том, Жерри хоёр” анимэйшн тун удахгүй нээлтээ хийх бөгөөд үргэлжлэх хугацаа 100 минут.