BTS хамтлагийн “Найз” дуу, Марвел “Eternals” киноны OST-д багтжээ
2021-10-26 12:21:43
BTS хамтлагийн дуу Марвелын “Eternals” кинонд сонгогджээ. 2021 оны 10-р сарын 17-ны өдөр “The Direct” сайтад “Eternals” киноны original soundtrack жагсаалтад багтсан 15 дууг нийтэд дэлгэжээ. Эдгээр 15 дуунд BTS хамтлагийн “Найз” дуу багтжээ. Уг дууг тус хамтлагийн гишүүн Пак Жи Мин продюсерлосон анхны бүтээл юм. Мөн тус өдөр олон нийтэд дэлгэсэн жагсаалтад Карл Перкинс, Скитер Дэвис, Мерл Хаггард, Пинк Флойд, Лиззо гэх зэрэг үе үеийг төлөөлсөн дуучдын хөгжим багтсан байна. Контри, рок, поп төдийгүй Бахын сонгодог хөгжим ч бас сонгогдсон гэсэн нь үнэхээр онцгой гэдгийг илтгэх аж. “MCU-ийн үнэхээр их нөлөөлөх бүтээл, шинэ чиг хандлагыг санал болгоно” гэж Кевин Файги уламжилсан шиг дуу хөгжмөөс нь харахад өөр зэрэглэл гэдгээр үзэгчдэд хүлээлтийг маш ихээр үүсгэж байна.
“Eternals” кино нь олон жил дэлхийд оршдог мөнхийн баатрууд “Авенжерс: Эцсийн тулаан”-ы дараа хүн төрөлхтний өнө удаан жилийн дайсан Дэвиантай халз тулалдахын тулд дахин хүчээ нэгтгэж буй тухай өгүүлэх ажээ. Холливудын хамгийн том төлөөлөгчдийн нэг жүжигчин Анжелиа Жоли, HBO-ийн алдартай олон ангит кино “Хаадын тоглоом” цувралын Ричард Мэдден, Кумэйл Нанжиани, Сальма Хайек, Жемма Чан зэрэг жүжигчид хамтдаа тоглосон нь анхаарал татаад байна. “Train to Busan” зэрэг киногоор олны хайр хүндэтгэлийг хүртсэн БНСУ-ын жүжигчин Ма Дун Сог Гилгамешийн дүрийг бүтээсэн байна.
Мөн “Nomadland” киногоор 93 дахь удаагийн Академийн шагналаас шилдэг кино, шилдэг кино найруулагчийн шагнал, 78 дахь удаагийн Алтан бээлийнээс шилдэг бүтээл, шилдэг найруулагчийн шагнал, 77 дахь удаагийн Веннийн олон улсын кино наадмаас алтан арслан шагнал зэргийг хүртэж энэ үеийн шинэ амжилт тогтоон, нийт 232 гаруй шагнал авч дэлхий дахиныг гайхшруулсан Хлое Чжао найруулагчаар нь ажиллаж, өвөрмөц өнгө аясыг харуулсан баатруудын гайхалтай тулалдаанаар гүн гүнзгий шинэ түүхийг өгүүлж, Марвелын шинэ ертөнцийг харуулах ажээ. 2021 оны 11-р сарын 05-ны өдөр нээлтээ хийнэ.
