Рианна, “Black Panther: Wakanda Forever” киноны дууг дуулна

2022-10-28 16:44:54

Дуучин Рианна(нас 34) Марвелын баатартай кино “Black Panther: Wakanda Forever” киноны дууг дуулна. 2022 оны 10-р сарын 26-ны өдөр Variety сайтад “Рианна “Black Panhter: Wakanda Forever”-ийн “Lift me up”-аар эргэн ирнэ” гэж нийтлэгджээ. 

Чадвик Боузманы амьдрал, уран бүтээлийн тухай өгүүлэх тус дууг Темс, Людвиг Йоранссон, Рианна, Райан Куглер найруулагч нар бүтээжээ. 2022 оны 10-р сарын 28-ны өдөр тус дуу олны хүртээл болно. Темс “Райан Куглер найруулагчтай ярилцаж байгаад дууны талаарх түүний санааг сонсоод надад хорвоог орхисон бүхий л хүмүүсийнхээ халуун тэврэлтийг дүрслэн бичих хүсэл төрсөн.” гэж хэлжээ. 

Улмаар “Хэрэв одоо надад тэдэнд дуу дуулж өгч, тэднийг хэчнээн их үгүйлэн санаж байгаагаа илэрхийлэх боломж олдвол сэтгэл ямар байх бол оо гэж төсөөлөхийг хичээсэн.”, “Рианна бол надад гайхалтай мэдрэмжийг өгсөн дуучин учир тэрээр энэ дууг дуулах нь нэр төрийн хэрэг.” хэмээн хэлсэн байна. Хар ирвэс буюу Т’Чалла хааны дүрийг бүтээсэн Чадвик Боузман 2020 онд 43 насандаа бүдүүн гэдэсний хорт хавдраар хорвоог орхисон билээ.

“Black Panther: Wakanda Forever” кино нь Вакандагийн хаан Хар ирвэс Т’Чалла өөд болсны дараа асар хүнд байдалд орсон Вакандаг хамгаалахын төлөө хувь тавилангаа дэнчин тавин байлдах дайн тулаан, шинэ сахин хамгаалагч төрөх талаар өгүүлэх блокбастер юм. 

“Black Panther: Wakanda Forever” 2022 оны 11-р сарын 11-ний өдөр нээлтээ хийнэ. 

Зургийн эх сурвалж: Disney