Нинтендогийн дараагийн бүтээл Зелда?

2023-05-03 03:48:29

Видео тоглоомын зохиолоор бүтээгдсэн “The Super Mario Bros. Movie” киногоор дэлхий дахины орлогоос урам авсан Нинтендо видео тоглоомын зохиолоор кино бүтээх талаар бодолцож үзнэ гэжээ. 2023 оны 04-р сарын 07-ны өдөр олны хүртээл болсон “The Super Mario Bros. Movie” кино 23 өдрийн байдлаар Умард Америкт 490.01 сая доллар, дэлхий дахинаас 1022.47 сая долларын орлого болж, 2023 онд нээлтээ хийсэн бүтээлүүдээс хамгийн их орлого олсон кино болжээ.

Нээлтээ хийгээд 2 өдрийн дотор 100 сая долларын орлого олж дуулиан тарьсан тус кино нээлтээ хийгээд 5 өдрийн дотор 375.57сая долларын орлого олж, видео тоглоомын зохиолоор бүтээгдсэн киноны хувьд хамгийн шилдэг нээлт, анимейшн киноны түүхэн дэх дэлхийн зах зээлд нээлтийн орлогоор 1-т, Умард Америкаас бусад бүс нутагт нээлтийн орлогоор 1-т бичигдсэн зэрэг амжилтуудыг шинэчлэн тогтоожээ.

Мөн нээлтээ хийснээс 9 хоногийн дотор “Warcraft The Beginning” (439.05 сая доллар) амжилтыг эвдсэн байна. Ялангуяа Японд 2023 оны 04-р сарын 28-ны өдөр нээлтээ хийх учир цаашид орлого илүү нэмэгдэх магадлал өндөртэй байгаа аж.

Онцгойлон Япон улс Мариог бүтээсэн Нинтендогийн эх орон гэдгээрээ 100 сая долларыг давна гэж найдаж байгаа билээ. Энэ бүхэнд урамшсан Нинтендогийн видео тоглоомын зураач Сигэрү Миямотогийн ярилцлагын үеэр “Дараагийн бүтээлийг хүлээгээрэй.” гээд өөр видео тоглоомын зохиолоор бүрэн хэмжээний кино хийх талаар нааштай мэдээллийг өгчээ.

Нинтендо компани “The Legend of Zelda”, “Donkey Kong”, “Kirby”, “Pokemon” зэрэг олон видео тоглоомын зохиогчийн эрхийг эзэмшдэг. Үүнээс 2019 онд The Pokemon Company, Warner bros хамтдаа бүтээсэн адил нэртэй видео тоглоомын зохиолоор хийсэн “Pokemon: Detective Pikachu” кино Умард Америкт 144.1 сая доллар, дэлхий дахинаас 449.76 сая долларын орлого олсон амжилттай байв. 

Амжилтдаа урамшин эх зохиолыг бичсэн зохиолч нар “Screen Rant”-д өгсөн ярилцлагынхаа үеэр “Nintendo Cinematic Universe” -тэй хамтрахыг хүсэж байгаа гэжээ. Ялангуяа тэд “The Legend of Zelda” цувралаар кино бүтээхийг хүсэж байгаагаа илэрхийлсэн бөгөөд тус цувралаар кино бүтээх магадлал өндөр байна.

“The Super Mario Bros. Movie” киногоор амжилт тогтоож урамшин Нинтендо болон бусад видео тоглоом бүтээгч компаниуд видео тоглоомын зохиолоор кино хийх талаарх сонирхол нь нэмэгдээд байна.

“Activision Blizzard” компанийн “StarCraft”, “Diablo” цувралын олон шүтэн бишрэгчид кино хийгээсэй гэж хүсэж байгаа. Гэвч одоогоор “Activision Blizzard” компанийн хувьд “StarCraft”-ийн дараагийн ангийг бүтээх ажил замхарч байгаагийн дээр “Microsoft” -д худалдагдаж магадгүй гэдэгт илүү анхаарч байгаа бөгөөд ойрын хугацаанд тус видео тоглоомоор кино хийгдэхгүй ажээ.

Сони мөн 2021 онд “Ghost of Tsushima”-г кино болгох талаар зарласан боловч, одоогоор Чад Стахелски найруулагч дотроо бодсон байгаагаас өөр тодорхой болсон зүйл байхгүй байна.  

Зургийн эх сурвалж: Universal pictures