Крис Прэтт “Галактикийн хамгаалагчид 3”-ыг үзэх эрин үед амьдарч байгаадаа баярлах болно”

2023-05-08 21:05:20

“Галактикийн хамгаалагчид 3” кино Гамораг алдаж уйтгар гунигт автсан Питер Квил аюулд унасан галактик болон хамтрагчаа хамгаалахын тулд дахин хамгаалагчдын багтай хүчээ нэгтгэх ба амжилттай биелүүлж чадаагүй тохиолдолд тэдний сүүлийнх ч байж болох даалгаварт гарах тухай өгүүлэх ажээ.

“Галактикийн хамгаалагчид” цувралыг үзүүштэй болгож бүтээсэн Жэймс Ганн найруулагч/зохиолч “Миний хувьд энэ киноны гол цөм нь Рокет болон түүний өнгөрсөн үеийн түүх байсан. Тэрээр хаанаас ирсэн, хэн болох зэрэг Рокетын тухай бүгдийг өгүүлэх нь маш чухал байлаа.” гэж мэдэгджээ.

Мөн “Миний хийж чадах зүйл бол хамгийн сайхан кино бүтээх байсан юм. Энэ киног бүтээнгээ үнэхээр их урам зоригийг мэдэрлээ.” гэж сэтгэл хангалуун байгаагаа илэрхийлсэн байна. 

Стар-Лордын дүрийг бүтээсэн Крис Прэтт “Энэ кино нь ухаангүй, онцгой, хязгаарлагдмал байдлыг давсан үнэхээр сонирхолтой бүтээл. Сэтгэл хөдлөл, өрөвч сэтгэл, уран сэтгэмж, дуу хөгжим, хөнгөн элэглэл, эрч хүчтэй өнгөний хослол, гайхалтай дүр төрх бүгд бий.”, “Үзэгчид энэхүү киног үзэж байгаа эрин үед амьдарч байгаадаа баярлах болно” гэж итгэлтэйгээр хэлжээ.

Гаморагийн дүрийг бүтээсэн Зое Салдана мөн адил “Сонирхолтой галзуу хулганад сууж, дараа нь сэтгэл хөдлөлөөр дүүрэн галзуу хулганад суух болно. Тэгээд дахин өөр галзуу хулганад суугаад ажиллуулахад тулаан байлдаан өрнөх болно. Энэхүү бүтээл сонирхол, сэтгэл хөдлөл, аймшиг гэх зэргийг бүгдийг нь мэдрүүлэх болно” гэж хэлсэн байна.  

“Галактикийн хамгаалагчид 3” яг одоо кино театруудад. 

Зургийн эх сурвалж: Disney