“Gran Turismo”, тоглогчоос уралдааны нисгэгч рүү

2023-08-04 12:20:18

Бодит түүхээс сэдэвлэсэн “Gran Turismo” кино нь ижил нэрт тоглоомд үнэхээр дурласан тоглогч хөвгүүн видео тоглоомын өөрийн аргыг машины уралдаанд бодитоор ашиглан мэргэжлийн уралдаанч болсон тухай өгүүлэх блокбастер юм. Олон нийтэд цацагдсан үндсэн постерт уралдааны машины дээр хамгаалалтын малгай өмсөөд уралдахад бэлэн Ян Марденборо (Арчи Мадеквэ), түүнийг харж буй Жэк Солтер (Дэвид Харбор), Дэнни Мур (Орландо Блүүм) нарын дүр төрх анхаарал татаж байна.

Мөн “Суут тоглогч, уралдааны дүрмийг өөрчиллөө” гэсэн үгээр хурдыг зөвхөн видео тоглоомд л мэдэрч байсан Ян Марденборо мэргэжлийн уралдаанч болсны дараа өрнөх гайхалтай түүхийг өгүүлэх ажээ.    

Тус бүтээл нь “Gran Turismo” тоглоомд донтсон хөвгүүн видео тоглоомын өөрийн ур чадварыг машины уралдаанд бодитоор ашиглан мэргэжлийн уралдаанч болсон тухай өгүүлэх аж. 2011 онд 90,000 оролцогчийг ардаа орхин Г.Т.Академид хамгийн залуу тоглогч болон түрүүлж, улмаар Г.Т.Академийн ялагчийн хувьд анх удаа “Формула-1” -д уралдах болсон Ян Марденборогийн бодит түүхээс сэдэвлэжээ.

“Gran Turismo” нь “PlayStation” видео тоглоом юм. Тус киноны найруулагчаар “District 9” (2009), “Elysium”(2013) зэрэг кинонуудыг бүтээсэн Нил Бломкамп ажиллажээ. Жүжигчин Арчи Мадеквэ, Ян Марденборогийн дүрийг бүтээж, түүнтэй хамт Орландо Блүүм, Дэвид Харбор нар тоглосон байна.  

Бодит түүхээс сэдэвлэсэн блокбастер “Gran Turismo” кино 2023 оны 08 сарын 25-ны өдөр нээлтээ хийнэ. 

Зургийн эх сурвалж: Sony pictures