Бодитоор уулзах “Фреддигийн пиццаны газар”

2023-08-25 17:35:52

“Фреддигийн пиццаны газарт өнгөрүүлсэн 5 шөнө” аймшгийн кино ижил нэрт видео тоглоомын эх зохиолоос сэдэвлэгдэн бүтээгджээ. Эх зохиол нь Америкийн видео тоглоом хөгжүүлэгч Скотт Коутоны бүтээсэн аймшгийн видео тоглоом юм. Тоглогчийн гол зорилго нь “Фредди Фазбийрийн пицца” гэдэг газарт хамгаалагчаар ажиллангаа аниматроникийн аюул заналаас амьд үлдэх билээ.

Тоглогч хамгаалагчийн өрөөн дэх хяналтын дэлгэцээр тус газрын өнцөг булан бүрд суурилагдсан хяналтын камерыг шалгах, мөн хаалгыг нээж, хаана. Тус видео тоглоомд “цахилгаан”-ыг хамгийн үр дүнтэй ашиглах ёстой байдаг.

Хяналтын камерыг харах, мөн хаалгыг цоожлоход цахилгаан хэрэгтэй ба цахилгаан нь хязгаартай байдаг. Тоглогч нь хязгаарлагдмал нөөцийг зөв хуваарилан аниматроникийн аюул заналыг даван гарах ёстой. Энэхүү стратегийн тоглоом нь кинонд хэрхэн гайхалтайгаар тусгагдах бол гэдэг нь ч бас үзэх ёстой нэг шалтгаан юм.   

Киноны үндсэн агуулга нь видео тоглоомтой төстэй. Киноны гол дүр Фреддигийн пиццаны газарт ажилд орж, шөнийн ээлжид ажиллангаа тулгарах үйл явдлуудын тухай өгүүлэх ажээ. Трэйлерээс харахад видео тоглоомын маскот болох “Фредди Фазбийр”-ээс авхуулаад эх зохиолд байнга харагдаж байсан аниматроник ч бас гарна.

Эх зохиол шиг эдний аюул заналаас амьд үлдэх үйл явцыг харуулсан кино аж. Гэхдээ киноны үндсэн зохиомж нь видео тоглоомоос сэдэвлэсэн боловч, эх зохиолыг тэр чигээр нь дагахгүйгээр өөр шинэ түүхийг бүтээсэн гэж мэдэгдээд байгаа. Кино, видео тоглоом хоёрт тодорхой ямар ялгаа байгааг кино нээлтээ хийж байж л мэдэх боломжтой ажээ. Киноны гол дүрийг “The Hunger Games”-ээр олонд танигдсан Жош Хатчерсон бүтээжээ. 

“Фреддигийн пиццаны газарт өнгөрүүлсэн 5 шөнө” кино 2023 оны 10-р сарын 27-ны өдөр нээлтээ хийнэ. 

Зургийн эх сурвалж: Universal pictures