Frozen x Moana x The Lion King кино багийнхан “WISH” кинонд хамтдаа

2023-09-29 10:57:44

Диснейн 100 жилийн ойд зориулан бүтээсэн “WISH” киноны гол дүр Аша, ид шидийн Росас вант улсын Магнифико хааны зурагтай постер цацагджээ.

Тус постерт ер бусын ид шидийн дуслуудын дунд өөр хоорондоо эсрэгцсэн Аша, Магнифико хааны дүр төрхийг харах боломжтой ажээ. Нил ягаан өнгөтэй Ашагийн постерт яг л өөрийн хүсэл мөрөөдлийнхөө төлөө урагшлах ёстой гэдгийг харуулсан аж.

Олон нийтэд цацагдсан трэйлерт Аша, түүнийг хамгаалдаг найз Валентино ямаа нь дуусашгүй эрч хүчтэй одтой тааралдаж гайхалтай аялалд гардаг тухай өгүүлдэг. 

Харин хөх өнгийн постертой Магнифико хаан нь гүн утгыг агуулах ажээ. Тэрээр хүсэл биелүүлдэг ид шидийн Росас вант улсыг захирч, хүслээ биелүүлэхийг хүссэн бүх хүний хайр хүндэтгэлийг хүртэж байгаа боловч олон нийтэд цацагдсан трэйлерт сэтгэлдээ хорон мууг тээж байгаа талаар өгүүлдэг.

Энэ өвөл нээлтээ хийх “WISH” киноны найруулагчаар “Фрозен” цувралыг найруулсан Крис Бак, “Раяа ба сүүлчийн луу”-ийн ерөнхий зураач Фон Верасунторн нар ажиллажээ.

Мөн хөгжмийн зохиолч, дуучин Жулия Майклз киноны дуун дээр хамтран ажилласан байна. “WISH” кино нь “Frozen”, “The Lion King”, “Moana”, “Beauty and the Beast” зэрэг дэлхий дахиныг шуугиулж байсан кино багийнхан бүгд хамтран ажиллаж 100 жил үргэлжилсэн Дисней анимейшн студийн хүсэл мөрөөдөл, эрч хүчийг хүргэх түүхэд төвлөрсөн мюзикл анимейшн юм. 2023 оны 12-р сарын 01-ний өдөр нээлтээ хийнэ. 

Зургийн эх сурвалж: Disney