Ридли Скотт, Вакин Финикс, “Наполеон” кинонд 23 жилийн дараа хамтран ажиллажээ...

2023-11-07 05:30:40

Ридли Скотт найруулагчийн шинэ бүтээл хийгээд Холливудын алдарт жүжигчин Вакин Финиксийн тоглосон энэ жилийн сүүлийн хагаст хамгийн ихээр хүлээлт үүсгэж байгаа “Наполеон” кино 2023 оны 11-р сарын 24-ний өдөр нээлтээ хийх гэж байна.

“Наполеон” кино нь өөрийгөө эзэн хаан болгосон аугаа жанжин “Наполеон”, хааны хайр, үнэнч анд “Жозефина” нарын нэг үеийн намтрыг дүрсэлсэн бүтээл юм. Онцгойлон тус бүтээлд “Гладиатор”, “Марсын Иргэн” киноны найруулагч Ридли Скотт, “Гладиатор”, “Жокер” киноны жүжигчин Вакин Финикс нар хамтран ажиллаж байгаа нь шуугиан тариад байна.

2000 онд “Гладиатор” киногоор Оскарын “Шилдэг кино” шагнал гээд нийт 5 шагнал хүртэж шинэ түүхийг бүтээж байсан хоёр эрхмийн 23 жилийн дараах дахин хамтран ажилласан бүтээл юм.   

Ридли Скотт өмнө нь ч, одоо ч агуу уран бүтээлч хэвээрээ байгаа бол Вакин Финикс “Жокер”(2020) киногоор Оскарын “Шилдэг гол дүрийн эрэгтэй жүжигчин” шагналыг хүртэж, Холливудын үзэгчид хийгээд кино шүүмжлэгчдийн хайртай жүжигчин гэдгээ батлан харуулсан.

“Наполеон” кино нь дэлхийг байлдан дагуулсан баатар Наполеон Бонапартын эрээнтэй бараантай амьдрал, түүний хайртай бүсгүй “Жозефина” нарын тухай өгүүлэх ажээ.

Түүний хайртай бүсгүй болон сайн анд нөхөр “Жозефина”-ийн дүрийг жүжигчин Ванесса Кирби бүтээжээ. Танилцуулга постерт Францын армийн хувцсыг өмссөн сэтгэл татам хүчирхэг төрхтэй Вакин Финиксийн бүтээсэн “Наполеон” үзэгчдийг хэрхэн хүнд цохилтод оруулах нь хүлээлт ихээр үүсгээд байна.

Зургийн эх сурвалж: Sony pictures