Солонгосын соёл урлагийн “Продюс” нэвтрүүлгийн эцсийн шатны 1~20 байр нь үзэгчдийн саналаар биш продюсерын сонголтоор байжээ

2019-11-14 03:12:33

Өмнөд Солонгосын "Мнет" студийн “Продюс” цувралын 3, 4-р улирлын нэвтрүүлгийн эцсийн шатны 1~20 оролцогчийг шалгаруулахад үзэгчдийн саналыг харгалзалгүй, продюсерын сонголтыг дагажээ.

11 сарын 7-нд Солонгосын цагдаагийн албаны мэдээллээр “Продюс 48”, “Продюс X101” шууд нэвтрүүлгээр мессеж санал хураалтыг хариуцаж байсан байгууллагад хадгалагдаж үлдсэн үзэгчдийн саналын эх дата "Мнет" –ийн шалгаруулсан оролцогчдын эзэлсэн байрнаас өөр байжээ.

Харин 11 сарын 5-нд Солонгосын шүүх "Мнет"-ийн “Продюс” цувралын шууд нэвтрүүлгийн мессеж санал хураалтын дүнг өөрчилсөн хэрэгт сэжиглэн "Мнет"-ийн Ань Жүнь, Ким Юнбом продюсер нарыг баривчилсан юм.

Шалгалтаар тус хоёр продюсер үзэгчдийн саналыг харгалзалгүй урьдчилж гаргаснаараа эцсийн дүнг зарласан нь илэрч, өөрсдөө ч буруугаа хүлээн зөвшөөрсөн байна.

Өөрөөр хэлбэл шалгаруулалтын эцсийн шатанд үлдсэн 20 оролцогчийг өрсөлдөж эхлэхээс нь өмнө байр эзлүүлчихсэн байсан гэсэн үг юм.

“Продюсерын сонголт” гэж олны дунд яригдсан нь ийнхүү үнэн болж, саналаа өгсөн үзэгчид эгдүүцэл дургүйцлээ илэрхийлсээр байна.

Ялангуяа тус тэмцээнээс төрсөн IZ*ONE, X1 хамтлагуудыг тарааж гишүүдийг нь дахин шалгаруулж авах ёстой гэсэн санал ч гарч байна.

"Мнет"студи дээрх хоёр нэвтрүүлэг гарах үед “100% үзэгчдийн сонголт!”, “Үзэгчид продюсер болно! Дэмждэг оролцогчдоо саналаа заавал өгөөрэй!” гэж эцсийн шатыг үзэгчдийн саналаар шийднэ гэдгийг олон удаа нийтэд зарласан билээ.

Гэтэл 7 сарын 19-нд нэвтрүүлсэн “Продюс X”-ийн хамгийн сүүлийн дугаарт шалгарах нь тодорхой болчихоод байсан оролцогч нар бүгд хасагдахад үзэгчдэд эргэлзээ төрсөн ажээ.

IZ*ONE хамтлаг 11 сарын 11-нд анхны цомгоо албан ёсоор худалдаанд гаргах болон тайзнаа эргэн ирж байгаагаа мэдэгдэх тоглолт хийх гэж байснаа хойшлуулжээ.