"Apple компани ирэх жил Apple TV•news•music багц үйлчилгээ нэвтрүүлж магадгүй"

2019-11-21 07:18:07

Apple компани дүрс бичлэг, дуу зэрэг олон үйлчилгээг нэгтгэсэн багц(bundled) үйлчилгээг ирэх жил нэвтрүүлж магадгүй гэж Bloomberg агентлаг 11 сарын 14-нд мэдээллээ.

Apple-ын ажилтны хэлж байгаагаар энэхүү төлбөртэй багц захиалгын үйлчилгээнд кино, олон ангит кино стрийминг үйлчилгээ болох Apple TV+ Apple news+, Apple music багтана гэнэ.

Үүнийг олон захиалагчтай болох гэсэн арга хэмжээ гэж үзэж болно.

Apple компани Apple news+ үйлчилгээг нэвтрүүлэхдээ сарын 9.99 долларын төлбөртэй байхаар тогтжээ. Төлбөрийн талыг Apple авч, үлдсэнийг нь сонин, сэтгүүлийнхэн авах юм байна.

Гэвч Apple news+ багцаар гарах тохиолдолд мэдээний үнэ хямдрах учир хэвлэлийнхний авах мөнгө багасаж болзошгүй гэж тус мэргэжилтэн хэлэв.

Apple-ын гол бүтээгдэхүүн Iphone-ы борлуулалт зогсонги байдалд орсонтой холбогдуулан, ашгаа нэмэгдүүлэх зорилгоор захиалгын үйлчилгээг нэвтрүүлэх гэж байгаа юм байна. Apple news+ 3 сард эхэлсэн бол, энэ сард Apple TV+ сарын 4.99 долларын төлбөртэй үйлчилгээгээ эхэлсэн билээ.

3 сард зах зээлд нэвтэрсэн Apple news+ хоёр өдрийн дотор 200 мянган захиалагчтай болсон боловч захиалагчийн тоог дахиж нэмэх амаргүй байгаа гэнэ.