Найруулагч Кристофер Ноланы Tenet киноны трэйлер, цаг хугацааны эргүүлэг

2019-12-28 00:20:03

"Warner Bros" компани 12 сарын 20-нд албан ёсны Youtube сувгаараа "Tenet" киноны эхний трэйлерийг цацлаа.

2 минутын богино трэйлер 2020 оны 7 сард болох нээлтийг тэсэн ядан хүлээхэд хүргэв.

"Memento(2001)", "Dark Knight(2008)", "Inception(2010)", "Interstellar(2014)" кинонуудаараа дэлхийд олон фэнтэй болсон найруулагч Кристофер Нолан ер нь ажлаа нууцалж хийдгээрээ алдартай. 12 сарын 20-нд "Warner Bros" компани "Tenet"(найруулагч Кристофер Нолан) киноны албан ёсны трэйлерийг нээсэн нь эрс шинэчлэл авчрах бүтээл болох нь уу гэсэн сэтгэгдэл төрүүллээ.

Трэйлерт Жон Дэйвид Вашингтон жингүйдэлд байгаа болов уу гэмээр хөнгөн шингэн хөдөлгөөнөөр барилгын хананд авирч байгаагаар гардаг. Тэгээд тун удалгүй эмнэлгийн орон дээр сэрж шалгуурт тэнцсэн хэмээн жүжигчин Роберт Паттинсоны хамтрагчаар ажилладаг. Тэд Дэлхийн 3-р дайн дэгдээхгүй байх даалгавар авдаг.

Трэйлерт урсгал сөрсөн завь, ослын дараа дахиад л ослын эхэн рүү буцаад оччихдог машиныг харуулж байгаа нь уг кинонд цаг хугацааны тухай өгүүлнэ гэдгийг илтгэж байна.

Киноны нэр Tenet нь “үзэл”, “номлол” гэсэн утгатай. Бас нэрийн төгсгөлд орсон T үсэг доошоо харсан байгаа нь давхарласан цаг ижил гэдгийг илэрхийлнэ. Иймд "Memento", "Inception" киноны дараах цаг хугацаатай холбоотой өөр нэгэн түүхийг үзүүлэх кино гэж таамаглаж болно.

"Tenet" киноны трэйлерт шинэ ажилтан буюу киноны гол дүрд багийн ахлах нь “Шинэ амьдралдаа тавтай морил” гэж мэндэлдэг. Ажилтан болсон гол дүр дараа нь барилга дотроос сумны ором олж хараад “Хараахан юу ч (буудах) болоогүй байна” гэж хэлдэг. Кино зүгээр нэг бодит ертөнцөд зарим үзэгдлийн цаг хугацааг өөрчлөөд зогсохгүй найруулагчийн өмнөх кинонуудад гардаг шиг олон давхцал цаг хугацаа, хэм хэмжээс зөрчилдөж байгааг өгүүлэх магадлалтай.

2020 оны 7 сарын 17-нд нээлтээ хийх "Tenet" кино нь 225 сая долларын өртгөөр бүтэж байгаа. Дензел Вашингтоны хүү Жон Дэйвид Вашингтоноос гадна, Роберт Паттинсон, Элизабет Дебики, Аарон Тейлор Жонсон нар тус кинонд тоглоно.

Найруулагч Кристофер Нолан саяхан Америкийн хэвлэлийнхэнд өгсөн ярилцлагадаа “7 улсад томоохон зураг авна. Хамгийн өргөн хүрээтэй бүтээл минь болж байна” гэж киногоо танилцуулжээ.

Тагнуултай, эхний трэйлер нь гарсан гэдгээс өөр мэдээлэл хараахан байхгүй байгаа учраас киноны үйл явдал нууцлаг, хүмүүсийн хорхойг улам хөдөлгөсөөр байгаа билээ.