“77 дахь удаагийн Алтан Бөмбөрцөг” наадмын хамгийн том дуулиан “1917”
2020-01-10 23:18:49
Найруулагч Сэм Мендесийн бүтээсэн “1917” кино нь Алтан Бөмбөрцөг наадмын шилдэг драм төрлийн кино, шилдэг найруулагч шагналуудыг эздэдээ авчирлаа.
1 сарын 5-нд Лос-Анжелес хотноо 77 дахь удаагийн Алтан Бөмбөрцөг шагнал гардуулах ёслол болж өнгөрлөө. Тус наадам нь Америкийн хамгийн том кино наадам болох “Оскар”-оос нэг сарын өмнө болдог, “Оскарын шагналын сунгаа” гэж болох юм.
Инээдмийн жүжигчин Рики Жервейсийн хөтөлсөн энэ удаагийн наадамд шилдэг кино шагналыг найруулагч Сэм Мендесийн найруулсан “1917” авч дуулиан тарилаа. Тус кино нь Герман цэргүүдийн занганд орсон цэргүүдээ аврахаар дайсны талбарт очсон хоёр англи цэргийн нэг өдрийн тэмцэл түүхийг өгүүлдэг. “1917” нь шилдэг драм кино төрөлд “The Irishman”, “Joker”, “Marriage Story”, “The Two Popes” кинонуудтай өрсөлдөж тус шагналыг өөрийн болгосноор хэр чанартай бүтээл вэ гэдгээ ийнхүү нотлон харууллаа.
Шилдэг инээдмийн эсвэл мюзикл кино шагналыг “Холливудэд Нэгэн Удаа” кино хүртлээ. Квентин Тарантино найруулагчийн ажилласан тус кино нь 1969 онд Холливудэд өрнөж байгаа үйл явдлыг өгүүлж, жүжигчин Шарон Тейт бусдад алагдсан хэргийг өвөрмөц өнцгөөс харуулсан юм. Энэ ангилалд “Dolemite is my name”, “Jojo Rabbit”, “Knives Out”, “Rocketman” кинонууд нэр дэвшсэн байна.
Бас гайхалтай жүжиглэлтээрээ шагшигдсан жүжигчид Алтан Бөмбөрцгийн шилдэг жүжигчний шагнал авснаар "Оскар" -т нэг алхам ойртлоо. Шилдэг эрэгтэй гол дүрийн шагналыг “Жокер” киноныхоо дүрээр дэлхий дахинаа нэр алдар нь ихээхэн цуурайтсан Хоакин Феникс гардлаа. Тэрээр “Жокер” бүтээлээрээ "Канны кино наадам" -ын дараах 2 дахь шагналаа гардаж "Оскар" -т нэг алхмаар ойртсон гэсэн үг юм.
Эмэгтэй гол дүрийн шагналыг “Judy” кинонд бодит дүр Жүди Гарландын дүрийг тун чадварлаг бүтээсэн Рене Зеллвегер хүртлээ.
Мюзикл эсвэл инээдмийн киноны шилдэг эрэгтэй гол дүрийн эзнээр “Rocketman” кинонд Элтон Жон дуучны дүрийг бүтээсэн Тарон Эгертон, эмэгтэй гол дүрд “Farewell” кинонд дүр бүтээсэн ази жүжигчин Аквафина нар тодорсон.
Драм ангилалд шилдэг эрэгтэй туслах дүрээр “Холливудэд Нэгэн Удаа” киноны жүжигчин Брэд Питт шалгарлаа. Тэрээр 1996 онд “Twelve Monkeys” киноны дүрээр энэхүү шагналыг авснаас хойш 2 дахь удаагаа уг шагналын эзэн боллоо. Харин шилдэг эмэгтэй туслах дүрээр “Marriage Story” киноны Лора Дерн шалгарлаа. Тэрээр ийнхүү 4 дэх удаагаа тус шагналыг гардсан амжилтаар нэрээ мөнхөллөө.
Шилдэг хүүхэлдэйн киноны ангилалд Лайка студийн бүтээл “Ноён Линкийн Гайхалтай Адал Явдал” кино шалгарч шуугиан тарилаа. Учир нь тэд “Тоглоомын Түүх 4”, “Араатны Хаан Арслан”, “ФРОЗЕН II”, “Лууг хэрхэн сургах вэ 3” гэсэн шилдэг кинонуудыг ардаа орхиж энэхүү шагналын эзэд боллоо.
Эцэст нь жүжигчин Том Хэнкст кино урлагт оруулсан хувь нэмрийг нь үнэлж найруулагч Сесил Блаунт Демиллийн нэрэмжит шагнал олголоо.
Зургийн эх сурвалж: Universal pictures
