“Bohemian Rhapsody”-ийн Рами Малек “007” киноны эсрэг дүрд

2020-01-14 18:49:56

“Bohemian Rhapsody” киноны Queen хамтлагийн ахлагч Фредди Меркьюригийн дүрийг тун чадварлаг бүтээсэн Рами Малек 4-р сард нээлтээ хийх “007 Үхэх ч завгүй” кинонд эсрэг дүрийг бүтээлээ.

Жэймс Бондын дүрд урьдын адил Даниел Крейг тоглоно. MI6-ын дарга M-ийн дүрд Рэйф Файнс, Мадлен Суоннд Леа Сейду, Q-д Бен Вишоу, Ив Манипеннид Наоми Харрис нар тоглоно. Даниел Крейгийн хувьд энэ кинонд сүүлчийн удаа тоглож байгаагаа мэдэгдсэн. 

“007 Үхэх ч завгүй” кинонд чөлөөндөө гарч MI6-аас явсан Жэймс Бондын тухай өгүүлнэ. Ямайкт амарч байсан Жэймс Бонд хулгайлагдсан эрдэмтнийг аврах хүсэлтийг хүлээн авснаар шинэ адал явдал өрнөнө. Сафин түүнийг үүргээ гүйцэтгэхэд саад хийж байгаа алан хядагч болж гарна. Учир битүүлэг түүхтэй энэ хүн аюултай шинэ технологиор дэлхийг сүйрүүлэх төлөвлөгөө сэднэ.

“007” цувралд Густав Грейвз(Тоби Стивенс), Электра Кинг(Софи Марсо) гэх мэт өөр өөрийн сэтгэлд хүрсэн эсрэг дүрүүд гарч байсан билээ. Рами Малек Сафины дүрийг мөн адил өөрийн гэсэн өвөрмөц дүр төрхөөр бүтээнэ. Тэрээр Америкийн “Empire” сэтгүүлд өгсөн ярилцлагадаа “Хэн нэгнийг дуурайлгүйгээр өөрийн гэсэн дүр бүтээмээр байна. “Bohemian Rhapsody”-ийн Меркьюрид тоглохдоо би сайтар ухаарсан” гэж дүрийнхээ тухай хэлжээ.

“Skyfall” 1.1 тэрбум доллар, “Spectre” 0.88 тэрбум долларын орлого олсон юм.

Дараагийн анги буюу “007 Үхэх ч завгүй” 4 сарын 10-нд кинотеатруудын дэлгэцнээ гарна.