Охин дүүгээ аварч 90 оёо тавиулсан 6 настай хүүд Крис Эванс бамбай бэлэглэнэ

2020-07-21 10:48:21

Вайоминг мужид амьдардаг 6 настай хүү Бриджер Уокер 7-р сарын 9-ны өдөр шепард нохой охин дүү рүү нь дайрахад урдуур нь орж хамгаалсан байна. Бриджер нүүрэндээ хазуулж, хүнд бэртэл авснаар 2 цаг мэс засалд орж 90 оёо тавиулжээ.  

7-р сарын 16-ны өдөр Америкийн “Variety” сайтад Ахмад Америкийн дүрээрээ олонд танигдсан жүжигчин Крис Эванс нохойн дайралтаас охин дүүгээ аварсан 6 настай хүүгийн баатарлаг үйлийг үнэлэн биширч байгаагаа бичлэгээр уламжилжээ. Тэрээр хүүд ахмад Америкийн бамбайг бэлэглэхээр болжээ. 

Крис Эванс, Бриджер Уокерт зориулсан бичлэгт “Найз минь, чи бол баатар”, “Чиний хийсэн үйл бол үнэхээр зоригтой, бусдын төлөө байсан. Охин дүү чинь чам шиг ахтай нь үнэхээр азтай хэрэг. Эцэг, эх чинь ч мөн их бахархаж байгаа.” хэмээгээд тэрээр “Цаашид одоогийнх шигээ сайн хүн болж өсөөрэй. Бидэнд чам шиг хүн хэрэгтэй. Шарх нь эдгэхэд цаг хугацаа шаардагдах боловч, удахгүй эдгэх болно оо” гэжээ. 

Бриджерийн авга эгч Николь үеэл дүүгийнхээ тус зоригтой үйлийг өөрийн нийгмийн сүлжээндээ нийтэлсэн бөгөөд “Авенжерс”-ийн гишүүдийг #tag хийжээ. Тэднээс Крис Эванс хүүгийн хийсэн үйлдлийг үнэлж буйгаа илэрхийлснийг гаднын хэвлэл мэдээллийнхэн онцлон нийтлээд байна. Хүүгийн гэр бүлийнхэн нийгмийн сүлжээгээр “Үнэхээр, юу гэж хэлэхээ мэдэхгүй байна. Маш их, үнэхээр их баярлалаа.” гэж талархсан сэтгэлээ илэрхийлсэн байна.