"ТЕНЕТ" кино 8-р сарын 26-ны өдөр нээлтээ хийхээр болжээ

2020-07-29 19:14:45

7-р сарын 27-ны өдөр “Warner Bros” компани нь Кристофер Нолан найруулагчийн шинэ бүтээл “ТЕНЕТ” киноны нээлтийг Бельги, Болгар, Хорват, Дани, Египет, Эстони, Финланд, Франц, Нидерланд, Унгар, Исланд, Индонез, Итали, Латви, Литва, Португали, БНСУ, Серби, Словак, Швед, Швейцар, Турк, Украин, Англи гэх мэт улсуудад 8-р сарын 26-ны өдөр хийнэ мэдэгджээ.      

Олон улсад нээлтээ хийснээр, 9-р сарын 3-ны өдөр хамгийн том зах зээл болох АНУ-д нээлтээ хийх төлөвтэй байна. Тус кино нь коронавируст цар тахлаас хойш нээлтээ анх удаа хийж байгаа Холливудын блокбастер кино болох нь ээ. Өмнө нь гурван удаа нээлтийн өдрөө хойшлуулсны хэрээр үзэгчдийн хүлээлт маш өндөр байна. 

Кристофер Нолан найруулагчийн дурлаж хийсэн уг бүтээл нь ирээдүйн дайралтыг сөрөн зогсож дэлхийн 3-р дайныг зогсоохын тулд урвуу цаг хугацааны урсгалыг ашиглан тэмцэж буй тулаант блоксбастер кино юм. Кино түүхэнд хамгийн олон буюу дэлхийн 7 улсад IMAX болон 70 мм хальсны камераар зураг авч, өмнө нь байгаагүй нарийвчлалтай орон зайг бүрэн харуулжээ.

Жон Дэвид Вашингтон, Роберт Паттинсон, Кеннет Брана, Элизабет Дебики, Аарон Жонсон, Майкл Кейн нар тоглосон байна. Тус кино нь 2020 оны хамгийн их хүлээлт үүсгэж байгаа бүтээл бөгөөд коронавируст халдварын үеийн хямралыг даван гарах аврагчаар тооцогдоод байна.  

Зургийн эх сурвалж: Warner bros