“Wonder woman 3” кино орчин үеийн үйл явдал...
2021-01-04 22:31:52
2020 оны 12-р сарын 29-ний өдөр “Slash Film” сайт Америкийн нийтийн соёлыг түгээгч “Den of Geek” сайт болон Пэтти Женкинс найруулагчийн ярилцлагаас “Wonder Woman 3” киноны талаарх таамаглалуудыг дурджээ. “Warner bros” компани “Wonder Woman 1984” киногоор амжилт олж, 2020 оны 12-р сарын 27-ны өдөр “Wonder Woman 3” киног бүтээхээ албан ёсоор зарласан. Галь Гадот гол дүрд нь тоглож, Пэтти Женкинс дахин найруулагчаар нь ажиллах ажээ.
Үүний талаар Пэтти Женкинс найруулагч аль хэдийн хоёр ангийн зохиолыг төлөвлөчихсөн байгаа гэж танилцуулсан. Дахин өнгөрсөн цаг үе рүү явах бодолгүй байгаа бөгөөд орчин үед киноны үйл явдал өрнөнө хэмээжээ. Мөн “Wonder Woman 1984” кинонд хорон санаатан Читагийн үхэл нь тодорхой бус байсан тул дахин гарч ирэх боломжтой гэдгийг өнгөцхөн дурдсан байдаг. Найруулагч Пэтти Женкинс “Эмэгтэйчүүд өөрсдийгөө өөрчлөлгүйгээр байгаагаараа бусдад хүлээн зөвшөөрөгдөх боломжтой талаар өгүүлэх болно” гэж мэдэгджээ.
“Slash Film” сайт Пэтти Женкинс найруулагчийн хэлсэн үг болон “Warner bros” компанийн албан ёсны мэдэгдэл зэргээс “Wonder Woman” цуврал гуравхан ангитай бөгөөд дараагийн нэг анги нь “Wonder Woman 1984”, “Wonder Woman 3” хоёрын дундах үйл явдлын талаар өгүүлнэ гэж таамаглажээ. Хоёр анги байгаа гэж Пэтти Женкинс найруулагчийн хэлсэн шиг, тэрхүү түүх үргэлжлэх, эсвэл “Wonder Woman 4” кино болох эсэх нь одоогоор тодорхойгүй байна гэж уламжилсан байна.
