“Хүн-Аалз: Буцах Замгүй” киноны анхны албан ёсны постер цацагдлаа

2021-11-11 14:48:34

Энэ оны хамгийн их хүлээлт үүсгээд байгаа бүтээл болох “Хүн-Аалз: Буцах Замгүй” киноны олон ертөнцийн эхлэлийг харуулсан анхны постер цацагджээ. “Хүн-Аалз: Буцах Замгүй” кино нь Хүн аалз болох “Петер Паркер(Том Холланд)”-ын хувийн мэдээлэл бүгд ил болсноор цаг хугацааг эргүүлэхийн тулд “Доктор Стрэнж(Бенедикт Камбербэтч)”-ээс тусламж авч байхад санаандгүй олон ертөнцийн үүд нээгдэж, эртний дайсан “Доктор Октавиус(Альфред Молина)” гарч ирснээр хамгийн аюулт дайсантайгаа нүүр тулах тухай өгүүлэх Марвелын тулаант блокбастер кино юм.

Олонд нийтэд цацагдсан эхний постерт “Хүн аалз 2(2004)” киноны хорон санаатан Док Окийн өөдөөс харан зогсох хүн аалз үзэгчдийн анхаарлыг татаж байна. Хүн аалз арматураар дүүрсэн барилгын суурин дээр Док Окийн төмөр гаруудаас зугтаж, тулалдахад бэлдэн түгшүүртэй зогсож байгаа нь сэтгэл түгшээнэ. Ийнхүү өмнөх “Хүн аалз” цувралын хорон санаатнууд гарч ирсэн байгаа нь цаг хугацааны тэнцвэр алдагдаж олон ертөнцийн үүд нээгдэж байгааг илтгэх аж. Түүнчлэн Хүн аалзанд нүүрлээд байгаа аюулыг харуулж, тэрээр энэхүү аюулаас хэрхэн гарах бол гэсэн сонирхлыг төрүүлж байна.    

“Хүн-Аалз: Буцах Замгүй” кино нь “Хүн-Аалз: Гэрээсээ Холдсон нь”(2019)-д Мистериогоос болж хэн болох нь илчлэгдсэнээс хойш дэлхийг аварсан баатраас гэмт хэрэгтэн болон хувирсан Хүн аалзны талаарх түүхийг өгүүлэх аж. Түүхэн дэх бүх “Хүн аалз” цувралыг багцлан Хүн аалзны хэн болох нь анх удаа илчлэгдэж байгаа учраас “Хүн-Аалз: Буцах Замгүй”-ын таамаглашгүй байдал хэрхэн өрнөх нь анхаарал татаж байна. Түүнчлэн тус кино нь MCU фаз 4-ийн гол цөм олон ертөнцийн талаар өгүүлж байгаа нь сонирхлыг татаж байна. Multiverse(олон ертөнц) ертөнцийг үзэх үзлийг харуулж байгаа нь илүү нарийвчлалтай, нэг шат ахиу тулалдаан, аюулыг даван туулж, илүү хөгжин дэвжсэн Хүн аалзны дүр төрхийг харуулах “Хүн-Аалз: Буцах Замгүй” кино нь 12-р сард дэлхийн кино театруудыг байлдан дагуулах ажээ.

“Хүн-Аалз: Буцах Замгүй” кино 2021 оны 12-р сарын 17-ны өдөр нээлтээ хийнэ. 

Зургийн эх сурвалж: Sony pictures