Жүжигчин Роберт Паттинсоны бүтээсэн The Batman... “The Dark Knight”-аас илүү байх болов уу?

2022-02-08 16:05:18

Комик номын эх зохиолоор бүтээгдсэн супер баатартай киноноос үргэлжлэх хугацаагаар гуравдугаарт орох бүтээл нээлтээ хийнэ. Кристофер Нолан найруулагчийн “The Dark Knight” цувралаас илүү байна гэж үнэлэгдэн хүлээлт үүсгээд байгаа Мэтт Ривз найруулж, Роберт Паттинсон гол дүрийг нь бүтээсэн “The Batman” кино 2 цаг 56 минут (176 минут) үргэлжлэх ажээ.

Америкийн “Variety” сайтад “The Batman” киноны үргэлжлэх хугацаа ending credit-ийг оруулахгүйгээр 2 цаг 47 минут гэж нийтэлсэн байна. Марвелын “Авенжерс: Эцсийн тулаан” киноны үргэлжлэх хугацаа 3 цаг 1 минут (181 минут) байсан бөгөөд DC комикийн эх зохиолоор хийсэн киноноос “Snyder’s cut” гэж нэрлэгддэг Зак Снайдер найруулагчийн дахин редакторласан “Zack Snyder’s Justice League” киноны үргэлжлэх хугацаа 4 цаг 2 минут (242 минут) байсан.

“The Batman” кинонд сайн, муугийн зөрлөг дээр зогссон үл энэрэгч Бэтмэн, түүнийг хөдөлгөх оньсого мэт хорон санаатан Риддлертэй ширүүн тулалдана. “War for the Planet of the Apes” киноны найруулагч Мэтт Ривз найруулснаар Бэтмэний шинэ түүхийг өгүүлэх аж. Роберт Паттинсон нь Брюс Уэйний дүрийг бүтээх ба Брюс Уэйн нь Бэтмэний үйл хэргээ эхлүүлж буй эхэн үеийг харуулна. Хорон санаатан Риддлерийн дүрийг Пол Дано, Пингвиний дүрийг Колин Фаррелл нар бүтээжээ. Мөн өөр нэгэн хорон санаатан Фальконий дүрийг Жон Туртурро бүтээсэн байна.

“Catwoman”-ий дүрийг Зои Кравиц, Жеймс Гордон даргын дүрийг Жеффри Райт, Альфредийн дүрийг Энди Серкис нар бүтээжээ. Одоогоор олон нийтэд цацагдаад байгаа “The Batman” киноны трэйлерт Бэтмэний эхэн үеийн догшин тулалдаантай хамт хүйтэн уур амьсгалыг тэр чигт нь шингээсэн ба Кристофер Нолан найруулагчийн шилдэг бүтээл гэж тооцогддог “The Dark Knight” киноноос илүү байх хэмээн “The Batman” кино анхаарал татаж байна. 

2022 оны 3-р сарын 3-нд нээлтээ хийнэ.

Зургийн эх сурвалж: Warner bros