Ээдрээт цаг хугацаа, орон зайн хэмжээс... үнэхээр жихүүцэл төрүүлэм аймшиг бий болно
2022-05-16 16:13:45
“Doctor Strange in the Multiverse of Madness” нь олон ертөнц дунд, MCU-ийн түүхэн дэх анхны хязгааргүй үргэлжлэх хэмжээсний хагарал, ээдрээтэй цаг хугацааг дүрсэлсэн ер бусын аймшигт блокбастер кино юм. Ноднин жилийн сүүлээр олны хүртээл болсон “Хүн-Аалз: Буцах замгүй” (Жон Уоттс) кинонд гарсан үйл явдлаас хойших түүхийг өгүүлэх ажээ.MCU-ийн 4-р фазийн гол хэрэглэгдэхүүн болох олон ертөнцийг таниулж буй бүтээл юм. “Хүн-Аалз: Буцах замгүй”-д олон ертөнцийн талаар зурвасхан үзүүлсэн бол “Doctor Strange in the Multiverse of Madness”-д илүү гүнзгий харуулах аж.
MCU-д шинээр нэгдсэн дүр Америк Чавез (Сочил Гомес) нь олон ертөнцөөр аялах (нэвтрэх, зочлох )чадвартай нэгэн. Тэрхүү чадварын улмаас хэн нэгнээс зугтаж байсан тэрээр бидний мэдэх Доктор Стрэйнжтэй уулздаг. Доктор Сртэйнж нь нуугдаж амьдарч байсан Ванда Максимоффоос тусламж хүсэх боловч Ванда Максимофф нь аль хэдийн Даркхолдын эрхшээлд автсан байдаг. Тэрээр бас Америк Чавез шиг чадвартай болохыг хүсдэг.
Өөр олон ертөнц дунд, хүүхдүүдтэйгээ сайхан амьдарч байсан Ванда Максимоффын байр суурийг булааж авахыг шунадаг. Ийнхүү Ванда Максимофф, Доктор Стрэйнж нарын хоорондох тэмцэл эхэлдэг. Disney+ “ВандаВишн”-д харуулсан шиг, Ванда Максимофф нь харамсалтай түүхтэй нэгэн. Гэвч “Doctor Strange in the Multiverse of Madness”-т хорон санаатан болсон Ванда Максимофф нь киноны турш айдсыг төрүүлдэг.
Доктор Стрэйнж нь Америк Чавезтай олон ертөнцөөр аялах бөгөөд тус аяллын тусламжтайгаар олон ертөнцийн олон өнгө төрх мөн бидний мэдэхгүй Доктор Стрэйнжтэй танилцах нь тун догдлом. Өхөөрдөм, авьяаслаг Сочил Гомесийн жүжиглэлт бас харц булаах болно. Тэрээр яагаад Америк Чавезын дүрийг бүтээснийг хормын төдий ойлгох болно.
Бенедикт Камбербэтчийн жүжиглэлтийн талаар ярих нь илүүц биз. Гэвч эдгээр жүжигчдээс илүү сэтгэл хөдөлгөсөн жүжиглэлтийг Элизабет Олсен харуулах ажээ. Сэм Рэйми найруулагчийн мэдрэмж бас тод харагдах болно. “The Evil Dead” цуврал, “Darkman”, “Drag Me to Hell” зэрэг киног найруулсан, аймшгийн киноны мастер тэрээр зөвхөн “Doctor Strange in the Multiverse of Madness”-т л гарах аймшигтай уур амьсгалыг бүрэн дүрсэлжээ.
“Doctor Strange in the Multiverse of Madness” яг одоо кино театруудад гарч байна. Кино 128 минут үргэлжилнэ. Кино дууссаны дараа гарах 2 танилцуулах видеог ч бас заавал үзээрэй.
Зургийн эх сурвалж: Disney
