Жордан Пил найруулагчийн шинжлэх ухаан, уран зөгнөлт хачирхалтай кино “NOPE”

2022-08-26 09:47:17

“Get out”, “US” киног найруулсан Жордан Пил найруулагчийн гурав дахь бүтээл “NOPE” нь төсөөллөөс өөр чиглэл рүү явж буй кино гэлтэй. Кино гэх үндсэн мөн чанараас бусад нь бүгд өөрчлөгджээ. “NOPE” кино нь гэнэтийн ослын улмаас нас барсан аавынхаа ажлыг үргэлжлүүлэн гэр бүлийн фермээ ажиллуулж буй Өү Жэй Хейвуд (Дэниел Калуя)-ийн тухай өгүүлнэ. Өү Жэй нь эмх замбараагүй нөхцөл байдал дунд эмэгтэй дүү Эмералд Хейвуд (Кики Палмэр)-тэй хамт сургасан морио кино, телевизийн нэвтрүүлэгт тоглуулдаг. Гэвч ажил санаснаар болоогүй, нэгэн өдөр хачин зүйл тэнгэрт байхыг хардаг. Тэрхүү зүйл нь юу болохыг мэдэхийг хүссэн хүнд төсөөлшгүй аюул нүүрлэдэг. Жордан Пил найруулагч “NOPE” киногоор өөрийн шинэ төрлийг бий болгожээ. Аймшиг, шинжлэх ухаан, уран зөгнөлт, нууцлаг байдлыг шинэ зохицлоор бүрэн өөрчилсөн түүхийг өгүүлэх ажээ. Кино эхлээд 1 цаг болох хүртэл кино яг юуг өгүүлэх гээд байгаа болон үйл явдал хаашаа явж байгааг мэдэхэд бэрх байх бөгөөд киноны төгсгөлд үйл явдлын зангилаа тайлагдах үед илбийн юм шиг догдлолыг мэдрэх болно.   

Аймшгийн кинотой үл зохицох агуулга, эд зүйлс гарах болно. Авцалдахгүй зүйлсээр аймшгийн болон айдсын киног холбосон чадвар нь үнэхээр гайхалтай. Тус кинонд мэдээж буг чөтгөр, алуурчин гарахгүй. Кино дуусахад ямар түүх, бэлгэдэл болох учир нь тайлагдана. Найруулагч кинондоо олон санааг багтаасан тул киног урьдчилан судлалгүй, ямар нэгэн мэдээлэл авалгүйгээр үзвэл илүү сонирхолтой. Жордан Пил найруулагчийн анхны бүтээл “Get Out” кинонд тоглосон жүжигчин Дэниел Калуя Өү Жэйн дүрийг бүтээжээ. “Interstellar”, “Dunkirk”, “Tenet” зэрэг Кристофер Нолан найруулагчийн кинонд хамтран ажилласан Хойте Ван Хойтема зураглаачаар ажилласан байна. Өнгөрсөн сард Умард Америкт түрүүлж нээлтээ хийж, бокс оффист 1-т бичигдэн Умард Америкаас 107 сая долларын орлого олжээ. 

Зургийн эх сурвалж: Universal pictures