“Black Adam ” кинон дээр гарч буй DC-ийн баатрууд
2022-09-30 07:57:56
Супер баатар болон хорон санаатны харилцаа яг л зоосны хоёр талтай адилхан гэлтэй. Хорон санаатан байснаар баатар байдаг бол баатар оршсоноор хорон санаатан оршин байна. 2022 оны 9-р сарын 09-ний өдөр DCEU-ийн “Black Adam” киноны трэйлерийг олон нийтэд хүргэсэн байна. Холливудын нөлөө бүхий жүжигчдийн нэг Дуэйн Жонсон хүчирхэг Блэк Адамын дүрийг бүтээсэн нь DC-ийн шүтэн бишрэгчдэд өндөр хүлээлт үүсгээд байна. Түүнээс гадна Блэк Адамтай зөрчилдөх Шударга Ёсны Нийгэмлэг үзэгчдийн анхаарлыг татаад байна. Супермэн, Бэтмэн, Вондер Вүмэн гурвыг л DC-ийн супер баатар гэж боддог хүмүүсийн хувьд “Хэн гэдэг баатар вэ?” гэж гайхширах нь гарцаагүй.
# Доктор Фэйт(Пирс Броснан)
Доктор Фэйт бол DC-ийн хүчирхэг шидтэн юм. Эртний алтан дуулганы сонгогдсон эзэн тэрээр Египетийн эртний бурхан Набугийн хүчийг авсан шидтэн юм. Тус кинонд Блэк Адам нь шидийн хүчийг эзэмшсэн сөрөг дүр бол түүний эсрэг мөн хүчирхэг шидтэн байгаа нь гайхалтай шидийн хүчний тулааныг харуулна хэмээн кино сонирхогчид таамаглаж байна.
# Хоукмэн (Элдис Хож)
“Black Adam” киноны трэйлерт Дуэйн Жонсоныг аймшиггүйгээр бууж өгөхийг ятгадаг тэрээр N-дүгээр металлаар хийгдсэн онцгой өмсгөлийн эзэн. Хоукмэний дүрийг комик цуврал дээр анх 1940 оны 1-р сард танилцуулж байжээ. Эх зохиолд Тет Адам/Блэк Адам, Набутай хамт эртний Египетэд амьдарч байснаар гардаг. Эрт үед түүний эхнэр нас бардаг ч, одоо цагт Америкийн археологич Картер Холлын дүрээр дахин төрдөг байна. Нисэх чадвартай, төмөр муна ашиглах зэрэг нь хүчирхэг тулалдааныг харуулна гэсэн хүлээлтийг үүсгээд байна. Доктор Фэйт, Блэк Адам нар шидийн хүч ашиглан тулалддаг бол Хоукмэн нь Блэк Адамтай нүцгэн гараар тулалдах ажээ.
# Циклон (Квинтесса Суинделл)
Циклон гэх нэрнээсээ л салхийг удирдах чадвартай нь харагдаж буй. Тэрээр удам дамжсан мета-хүн гэдгээрээ онцлогтой. Түүний эмээ Ма Ханкелийн дүрийг 1939 онд анх Улаан Хуй Салхи гэх нэрээр анхны эмэгтэй баатар болж комикс цувралд гарч эхэлсэн байдаг. Харин DCEU-д 2006 онд Циклон буюу Ма Ханкелийн ач охиныг товчхон дурдаад өнгөрч байжээ. Энэ удаагийн “Black Adam” кинонд хэсэг хугацаанд мартагдаад байсан Шударга Ёсны Нийгэмлэгийг дахин үзэгчдэд сануулахаар шийдсэн нь Атом бутлагч, Циклон зэрэг өсвөр насны баатрууд элсэж буйгаар дүрслэх боломж олгожээ.
# Атом Бутлагч(Ной Сентинео)
Атом Бутлагч нь биеэ өөрийн дураар томруулах чадвартай. Эх зохиолд тэрээр өөрийн биеэ 8м аварга том болгож чаддаг ажээ. Дээр дурдсан Циклон нь Улаан Хуй Салхи хэмээх баатрын ач охин бол Атом Бутлагч нь хорон санаатан Эл Праттын загалмайлсан хүү гэж гардаг. Энэхүү төвөгтэй холбоог “Black Adam” кинонд хэрхэн өгүүлэх нь сонирхол татаж байна.
“Black Adam” кино 2022 оны 10-р сарын 21-ний өдөр нээлтээ хийнэ.
