13 жил хүлээсэн... “Avatar: The Way of Water” киноны шинэ трэйлер цацагджээ

2022-11-09 14:42:03

“Аватар” киноны дараагийн ангийн трэйлер цацагджээ. “Walt Disney Company”, “20th Century Studios” нь 2022 оны 11-р сарын 03-ны өдөр Пандора гарагийн усан ертөнцийг харуулсан 2 минут 30 секундийн “Avatar: The Way of Water” киноны трэйлерийг олон нийтэд хүргэжээ.

“Avatar: The Way of Water” кино нь өмнөх ангийн үйл явдлаас хойш 10 гаруй жилийн дараах түүхийг өгүүлэх аж. Жэйк Салли (Сэм Уортингтон), Нэйтири (Зои Салдана) нар 4 хүүхдийн  эцэг эх болж, гэр бүлдээ амь амьдралаа зориулах талаар өгүүлэх ажээ. Трэйлерт гайхалтай усан ертөнц, эрч хүч ундарсан тулаан гарч байгаа нь анхаарал татмаар.

Энэ жилийн хамгийн их хүлээлттэй кино хэмээгдэж байгаа “Avatar: The Way of Water” кино 3 цаг гаруй үргэлжлэх ажээ. Холливудын “Reporter” зэрэг шар хэвлэлүүдэд “Avatar: The Way of Water” кино 3 цаг гаран үргэлжилнэ хэмээн нийтлээд байна. 2009 оны 12-р сард олны хүртээл болсон “Аватар” киноны үргэлжлэх хугацаа 2 цаг 41 минут байсан.

“Avatar: The Way of Water” кино “Авенжерс: Эцсийн тулаан” (3 цаг 02 минут) киноноос урт байх болно гэдгээрээ бахархаж байгаа. “Аватар 2” киноны баг трэйлерт “Саллигийн гэр бүлд тохиолдож буй гай зовлон, энх тайван байдлаа сахин хамгаалахын төлөөх аян, амьд үлдэхийн төлөөх тэмцэл, тэдний гэр бүлд тулгарах хүнд бэрхийг хэрхэн даван туулж байгааг тус кинонд өгүүлнэ” гэж танилцуулжээ.

“Avatar: The Way of Water” кино 2022 оны 12-р сарын 16-нд нээлтээ хийнэ. 

Зургийн эх сурвалж: Disney