“Хүн-Шоргоолж ба Хэдгэнэ: Квантуманиа”, сэтгэл догдлуулсан Марвелын фаз 5-ын гайхалтай эхлэл

2023-01-24 13:53:03

Марвелын фаз 5 эхэлж байгааг зарлаж, эргэн ирсэн “Хүн-Шоргоолж ба Хэдгэнэ: Квантуманиа” кино удахгүй нээлтээ хийх бөгөөд тус киноны талаар гаднын хэвлэл мэдээллийнхэн ихээхэн анхаарлаа хандуулж байна. Гаднын хэвлэл мэдээллийнхэн өнөө хүртэл үзэж харж байгаагүй квант ертөнцөөс авхуулаад хязгааргүй сансар огторгуйг сүрдүүлэх хүчирхэг хорон санаатан булаан эзлэгч Канг гарч ирэх гээд Марвелын фаз 5 руу орох эхний хаалга болох энэхүү бүтээлийг хэрхэн хүлээж байгаа талаараа дурджээ. Онцгойлон Hollywood Reporter, FANDANGO, IMDb, TIME, COLLIDER, Entertainment WEEKLY зэрэг гаднын нөлөө бүхий хэвлэл мэдээллүүд шинэ оныг угтан 2023 онд хамгийн их хүлээлт үүсгэж байгаа киноны жагсаалтад “Хүн-Шоргоолж ба Хэдгэнэ: Квантуманиа”-г оруулжээ.

“Хамгийн их хүлээлт үүсгэж байгаа Марвел студийн төслийн нэг.” (COLLIDER), “MCU-ийн хамгийн чухал цуврал болох болно.” (SCREEN RANT), “MCU-ийн фаз 5 нь Марвел студийн хамгийн жижиг Авенжерст зориулсан хамгийн том кино болох “Хүн-Шоргоолж ба Хэдгэнэ: Квантуманиа”-ын ачаар сэтгэл донслуулан эхлэх нь ээ.” (THE DIRECT), “Кинонд дурлагсдыг квант ертөнцийн агуу адал явдал уруу хөтлөх болно” (Geek Tyrant), “Удаан хүлээсэн MCU-ийн хамгийн нэр хүндтэй дүрүүд эргэн ирэх болно” (ITM) гэх зэргээр бичсэн байна.

Тус кино нь үл мэдэгдэх ертөнц “квант”-д унасан “Хүн-Шоргоолжийн гэр бүл” MCU-ийн түүхэн дэх хамгийн хүчирхэг хорон санаатан хийгээд хязгааргүй сансар огторгуйг захирдаг булаан эзлэгч “Канг”-тай нүүр тулж, цаг хугацаа, орон зайг давсан аймшигтай сүрдүүлгийг сөрөх тухай өгүүлэх ажээ. “Хүн-Шоргоолж”-ийн дүрийг Пол Радд, “Хэдгэнэ”-ний дүрийг Эванжелин Лилли нар бүтээж, хэрхэн хамтрах бол гэдэг нь хүлээлт үүсгээд байна. “Хүн-Шоргоолж ба Хэдгэнэ” киногоор өөрийгөө харуулсан “Жанет ван Дайн”-ы дүрийг бүтээсэн Холливудын нэрт жүжигчин Мишель Пфайффер дахин тоглох ажээ. “Жигтэй явдал” кинонд тоглосон Кэтрин Ньютон “Кэсси Лэнг” охины дүрийг бүтээхээр шинээр нэгдэж, Дисней+ “Loki” цувралаар анх гарч ирсэн Жонатан Мейжорс “Булаан эзлэгч Канг” -ийн дүрийг бүтээжээ.

“Хүн-Шоргоолж ба Хэдгэнэ: Квантуманиа” кино 2023 оны 02-р сарын 17-ны өдөр нээлтээ хийнэ.

Зургийн эх сурвалж: Disney