“Галактикийн хамгаалагчид”-ын Жеймс Ганн, “Супермэн”-ийг найруулна...
2023-03-25 17:34:46
Марвелын “Галактикийн хамгаалагчид” цувралаар алдаршсан Жеймс Ганн найруулагч DC-ийн төлөөлөх баатартай кино “Супермэн” цувралыг найруулахаар болжээ. Жеймс Ганн 2023 оны 03-р сарын 15-ны өдөр өөрийн твиттертээ “2025 оны 07-р сарын 11-ний өдөр нээлтээ хийх “Superman: Legacy” киног найруулахаар болсон.” гэсэн пост оруулсан байна.
Тэрээр “Миний дүү Мэтт киноны нээлт хийх өдрийг хараад уйлж эхэлсэн. Яагаад уйлчихав аа гэж асуухад “Аавын төрсөн өдөр шүү дээ” гэж хэлсэн. Тэрийг мэдээгүй байлаа.” гээд “Гурван жилийн өмнө аавыгаа алдсан. Тэрээр миний хамгийн дотны найз байсан юм. Бага байхад намайг ойлгодогүй байсан боловч, хошин шог, киноны талаарх миний хүсэл сонирхлыг дэмждэг байлаа. Аав маань дэмжээгүй бол энэ киног хийж чадахгүй байх байлаа” гэж хэлжээ. Мөн “Энэ хүртэл ирэхэд маш урт аялал байлаа. Хэдэн жилийн өмнө “Супермэн”-ийг найруулах саналыг авсан боловч, тухайн үед Супермэний нэр хүндийг өсгөх өвөрмөц, сонирхолтой арга байгаагүй учраас татгалзсан” гэж нэмж хэлсэн байна.
Жеймс Ганн найруулагч “1 жил ч болоогүй байхад Супермэний өв хөрөнгө, өөрөөр хэлбэл, Криптон эцэг эх, Канзас мужийн тариачин эцэг эх нь бүгд Супермэн хэн болох, ямар сонголт хийх талаар олон талаас нь харуулсан аргыг олсон” гэж мэдэгджээ. “Superman: Legacy” кино нь Канзас мужийн Смолвилын Кларк Кент Криптоны супер өгөгдөл, хүний хүмүүжлийг хослуулах Супермэний тухай өгүүлэх ажээ.
2021 онд “The Suicide Squad” киног найруулж, DC-тэй хамтран ажиллах эхлэлээ тавьсан Жеймс Ганн найруулагч 2022 оны 10-р сард Warner Bros-ийн “DC” -ийн хөрөнгийг эзэмшигч шинэ компани болох “DC Studios” -ийн ерөнхийлөгч хийгээд гүйцэтгэх захирал гэсэн албан тушаалд томилогджээ.
Ийнхүү “Супермэн” цувралд гол дүрийг бүтээж ирсэн Хенри Кавилл дахин энэхүү дүрийг бүтээхгүй гэж мэдэгджээ. Хенри Кавилл нь Зак Снайдер найруулагчийн “Man of Steel”-д Супермэний дүрийг анх бүтээж, “БЭТМЭН СУПЕРМЭНИЙ ТЭМЦЭЛ Шударга ёсны эхлэл” (2016), “Жастис Лиг” (2017) кинонуудад бас тогложээ. Хенри Кавилл “Супермэн” цувралаас албан ёсоор бууж байгаагаа хэлээд “Жеймс Ганн, Питер Сафран найруулагч нартай уулзсан.
Гунигтай байгаа боловч би Супермэний дүрийг дахин бүтээхгүй.” гээд “Супермэн бол урьдын адил хажууд тань байгаа. Супермэний нөмрөгийг цаашид өмсөхгүй боловч, Супермэн хэмээх дүр хэзээ ч алга болохгүй” гэж хэлжээ. Үүний талаар Ганн найруулагч “Хенри Кавилл “Супермэн”-ээс больж байгаа биш, цаашид “Супермэн” төсөлд орохгүй юм.” гэж хэлсэн байна. Жеймс Ганн найруулагчийн “Супермэн” цувралын талаарх сонирхол нэмэгдэхийн зэрэгцээ шинэ Супермэний дүрийг ямар жүжигчин бүтээх бол гэдэг нь сонирхол ихээр татаж байна.
