Удахгүй нээлтээ хийх “Хүн-Аалз: Аалзны Ертөнцөөр” киноны 2 дахь трэйлер цацагдлаа

2023-04-16 13:44:00

“Sony pictures” 2023 оны 04-р сарын 04-ний өдөр албан ёсны олон нийтийн сувгаараа “Хүн-Аалз: Аалзны Ертөнцөөр” 2 дахь трэйлерийг нийтэд цацжээ.

Тус бичлэгт Хүн-Аалз Маялс Морелс (Шамик Мур) нь Гвен Стейси (Хейли Стайнферд)-тэй дахин уулзаад олон ертөнцөд байгаа бүх Хүн-Аалзыг аврахын тулд адал явдлын аянд гардаг тухай өгүүлэх ажээ. Маялс шинэ хамтрагчидтайгаа уулзаж, бүгд олон ертөнцийг устгахаар сүрдүүлж буй ер бусын хорон санаатныг зогсоохын тулд шаргуу тэмцдэг. Трэйлерт Маялс “Хүн-Аалз байхад их золиос шаардагдана” гээд баатар хүний туулах ёстой сэтгэлийн зовлонгийн талаар өгүүлдэг.

Тэрээр “Заримдаа зөв зүйл хийхийн тулд хамгийн их хүсдэг зүйлээсээ татгалзах ёстой болдог” гээд жинхэнэ баатар болж дахин төрж буй талаар өгүүлэх ажээ. 

Тус бүтээлд өөр олон ертөнцөөс төрөл бүрийн Хүн-Аалзнууд гарч ирэх нь кинонд дурлагсдын хүлээлтийг үүсгээд байна. “Хүн-Аалз: Аалзны Ертөнцөөр” кино нь “Avatar: The Last Airbender”-ийн найруулагч Жуакин Душ Сантуш болон “Сүнсний Ертөнц” киноны Кэмп Пауэрс, мөн өмнөх анги “Хүн-Аалз: Аалзны Ертөнц рүү”-ийн найруулагч Жастин Томпсон нар санаа зориг нийлэн бүтээсэн байна.

Уг нь тус кино 2022 оны 04-р сард нээлтээ хийхээр байсан боловч, 2023 он болж хойшлогдсон байна.

Гайхалтай өнгөний зохицол, компьютер графикаар үзэгчдийн анхаарлыг татах “Хүн-Аалз: Аалзны Ертөнцөөр” кино 2023 оны 06-р сарын 01-ний өдөр нээлтээ хийнэ. 

Зургийн эх сурвалж: Sony pictures