“Холли Бэйли өргөн дэлгэцийг гэрэлтүүлэх хувь тавилантай ажээ.”
2023-05-16 14:46:58
Америкийн кино шүүмжлэгчид болон кино мэргэжилтнүүд 2023 оны 05-р сарын 09-ний өдөр Лос-Анжелес хотноо Долби театрт гарсан “Бяцхан Лусын Дагина” киноны урьдчилсан үзэлтэд оролцож, өөрсдийн олон нийтийн сүлжээнд сэтгэгдлээ үлдээн хуваалцаж байна.
1989 онд анх олны хүртээл болсон адил нэртэй анимэйшний зохиолыг уран сайхны кино болгосон “Бяцхан Лусын Дагина”-д далайн цаана орших дэлхийг мөрөөдөж байсан адал явдал дүүрэн бяцхан лусын дагина Ариэль нь осолдсон ханхүү Эрикийг аварч, сэтгэлийнхээ дуу хоолойг дагаж хориотой хүний ертөнц рүү гарч буй тухай өгүүлдэг.
Гол дүрийн Ариэлийг цагаан арьст бус, өнгөт арьст жүжигчин Холли Бэйли бүтээж, магтаал шүүмжлэл ихээр дагуулж байна. Анхны урьдчилсан үзэлтээр эергээр үнэлж байв. Ариэлийн дүрийг бүтээсэн гол дүрийн жүжигчин Холли Бэйли, хорон санаатан Урсулагийн дүрийг бүтээсэн Мелисса Маккарти нарын жүжиглэлтийг сайшаан магтацгаажээ.
“Rotten Tomatoes” -ийн шүүмжлэгч Эрик Дэвис “Бяцхан Лусын Дагина” киног үнэхээр сайн бүтээсэн уран сайхны киноны нэг” гээд “Холли Бэйли нь Ариэльд гайхалтай сэтгэл хөдлөлийг шингээсэн нь үзэж байхад үнэхээр шар үс босгож байлаа.” гэж хэлжээ. Кино зохиол бичигч, шүүмжлэгч Фелисиа Вэйд бас “Холли Бэйли өөрөө Ариэль байлаа” гээд “Түүний жүжиглэлт үнэхээр шар үс босгом байж чадлаа. Өнөө хүртэл үзэж байгаагүй лусын дагинын тухай түүх байлаа.” хэмээн магтсан байна. Кино шүүмжлэгч Жои Роз Брайант “Бидний мэдэж хайрладаг түүхийн гол цөм, амин сүнсийг хадгалсан уран сайхны киноны шинэчилсэн хувилбар байлаа.” гээд “Холли Бэйлигийн нөлөө илүү байлаа.
Тэр бол өргөн дэлгэцийг гэрэлтүүлэх хувь тавилантай ажээ.” хэмээсэн байна. Улмаар “Ханхүү Эрикийн дүрийг бүтээсэн Жона Хауэр Кингтэй хамт сайн жүжиглэсэн ба үнэхээр хүчтэй хэр нь чөлөөтэй байсан.” гэж үнэлсэн байна. Мөн “The Insider” -ийн сэтгүүлч Кирстен Акуна “Киноны хамгийн том алдаа нь Урсулагийн тухай тодорхой гаргаагүй явдал” гээд “Учир нь Маккарти нь Урсулагийн дүрийн хувьд үнэхээр аймшигтай хорон санаатан бөгөөд бэлгэдлийн хорон санаатны дүрээр үзэгчдийг өөртөө татах байлаа” гэж хэлжээ.
Ариэлийн усан дахь найзууд болох хавч Себастьян (Давид Диггз), загас Флоундэр (Жейкоб Трамбле), цахлай Скаттл (Аквафина) нарын хошигнол нь үнэхээр зугаатай байсан гэж бас үнэлсэн байна.
Эрик Дэвис “Бидний мэдэх тэр дууг хэвээр нь хадгалсан шинэ дуу нь сонирхолтой байлаа. Ялангуяа Аквафинагийн дуунаас Лин-Мануэль Мирандагийн онцгой мэдрэмжийг мэдэрлээ” гэж бичжээ. Лин-Мануэль Миранда нь “Бяцхан Лусын Дагина” киноны хөгжмийн найруулагчаар ажилласан ба өмнө нь “Моана”, “Энканто” зэрэг бүтээлийн дуу, хөгжмийг бүтээхэд оролцож байсан чадварлаг хөгжмийн зохиолч юм.
Жои Роз Брайант “Кино театрт үзэхэд илүү тохиромжтой санагдлаа. Гар утаснаас трэйлерийг үзэхээс хавьгүй илүү байсан. Сонирхолгүй хэсэг нэг ч байгаагүй. Бүхэлдээ гоё байлаа.” хэмээн үнэлсэн байна. Урлагийнхны талаар мэдээлдэг “The next best picture” -ийн редактор Мэт Николиа “Далайн гүн нь харахад ширүүн харагдах боловч, кино багийнхны зүтгэлээр эх зохиолын ид шидийн зарим хэсгийг дахин амилуулж чаджээ.” хэмээсэн байна.
“Бяцхан лусын дагина” кино 2023 оны 05-р сарын 26-ны өдөр нээлтээ хийнэ.
Зургийн эх сурвалж: Disney
