“Хүн-аалз: Аалзны ертөнцөөр”, баатартай киноны хамгийн дээд цэгт хүрчээ

2023-06-30 03:25:51

2018 онд “Хүн-аалз: Аалзны ертөнц рүү” кино нээлтээ хийж, зоригтой, загварлаг баатартай кино гэж үнэлүүлэхийн зэрэгцээ тухайн жилдээ Оскар, Алтан бөмбөрцөг гээд кино наадмуудаас анимейшн төрлийн шагналыг түүсэн. Сони компани өнгөт арьстай баатрыг бүтээж, MCU-ийн орхисон орон зайг эзэлж амжилтад хүрчээ. Өмнөх анги нь амжилттай байсан учир дараах ангийн стандарт нь нэг шат ахисан байна.

“Хүн-аалз: Аалзны ертөнцөөр” кино энэхүү нөхцөл байдлыг үл тоон баатартай кинонуудаас хамгийн бүтээлч хийгээд урлагийн шинж чанарыг агуулсан бүтээл гаргахыг зорьжээ. “Хүн-аалз: Аалзны ертөнцөөр” кинонд шинэ Хүн-аалз Майлс Моралес (Шамик Мур) нь тоо томшгүй хүн-аалзнуудтай хамт олон ертөнцөд сансар огторгуйг эмх цэгцтэй байлгахын тулд хорон санаатан Толботой тулалддаг тухай өгүүлэх ажээ.

Гвен Стэйси (Хейли Стайнфелд) нь эмэгтэй Хүн-аалз бөгөөд аавтайгаа маргалдсан зөрчилдөөнөө даван туулж, харин Майлс Моралес баатар хүний хувь тавиланд тулгардаг ганцаардалтай нүүр тулдаг талаар өгүүлэх аж. 

Шинэ Хүн-аалз болсон Моралесын өмнө Гвен гарч ирж, олон ертөнцөд цоорхой гаргаж үймүүлэх Толбыг зогсоохын тулд аялалд гардаг. Энэхүү үйл явдлын дунд хайртай нэг хүнээ аврах уу, олон хүнийг аврах уу гэдэг сонголтын өмнө Моралес ирдэг.

Гэвч тэрээр өөрийн хүсэл зоригоо хувь тавиланг өөрчилж чадна гэж итгэн урагшилдаг. Хүн-аалзын нийгэмлэгийн ахлагч болох Мигуэл О’Хара (Оскар Айзек) нь Моралесын агшин зуурын сонголтоор өөрчлөгдөх хэмжээсийг зогсоохын тулд тэмцдэг.

Мөн өөрт өгөгдсөн хувь тавилангаас байнга зугтааж байдаг Моралестай зөрчилддөг. “Хүн-аалзын нийгэмлэг” гэх байгууллага гарч ирж, дэлхийн соёлын хүрээний 240 хүн аалз цугладаг.

Кинон дотор орсон мэт 2D, 3D-аар харуулсан дүрүүд, сонгодог зураглал гээд олон төрлийг хослуулан нүд баясгах ажээ. Түүнчлэн өнгө, мэдрэмж зэргээр дүрүүдийн сэтгэл зүйг хүртэл нарийн дүрсэлсэн байна. 

Зургийн эх сурвалж: Sony pictures