Тойм бичлэг нь 3 цаг 18 минут үргэлжлэх “Дисней плас”-ийн бэлтгэл ажил

2019-11-08 14:19:05

Дисней компани нь “Дисней плас” гэх стрийминг үйлчилгээгээ нээхэд маш бага хугацаа үлдлээ. Тус үйлчилгээгээр 8,000 гаруй контент үзэх боломжтой ба цаашид бүтээгдэх цувралууд нэмэгдэх юм.

Одоо тэрхүү гайхалтай бэлтгэл ажлыг харах ээлж л үлдлээ. Дисней плас нь тойм бичлэгээрээ үйлчилгээ эхлэх өдөр болох 11 дүгээр сарын 12-нд үзэх боломжтой контентын жагсаалтыг олон нийтэд ил болгов. Тус тойм бичлэгийн үргэлжлэх хугацаа 3 цаг 18 минут. Дисней компанийн анхны хүүхэлдэйн кино “Цасангоо ба долоон одой”(1937), шинэ “Оддын дайн”, “Мандалориан” цуврал тус тойм бичлэгийн эхлэл, төгсгөлийг чимж, олон бүтээлүүдийг бэлджээ.

Юун түрүүнд Дисней компанийн алдартай хүүхэлдэйн кинонууд нүдэнд тусна. “Цасангоо ба долоо одой” хүүхэлдэйн киноноос авахуулаад “Пиноккио”(1940), “Дамбо”(1941), “Үнсгэлжин”(1950), “Нойрсож буй гүнж”(1959) зэрэг Дисней компанийн эхэн үеийн бүтээл, мөн сонгодог хүүхэлдэйн кино “Бяцхан лусын дагина”(1989), “Гоо үзэсгэлэн ба араатан”(1991), “Аладдин”(1992), “Араатны хаан арслан”(1994), орчин үеийн бүтээл болох “Рапунзел”(2010), “Фрозен”(2014), “Моана”(2017) зэрэг бүтээлүүдийг Дисней пласаас үзэх боломжтой. Түүнчлэн “Тоглоомын түүх”, “Мангасуудын орон” цуврал, “Бодлын ертөнц”(2015) зэрэг Пиксар студийн бүтээл ч багтах тул үнэхээр хүүхэлдэйн киноны диваажин гэлтэй.   

Марвелийн цувралыг орхигдуулж болохгүй. “Марвел синематик юниверс” компанийг үүсгэн байгуулагдахад үнэтэй хувь нэмэр оруулсан “Төмөр хүн”(2008) киноноос авахуулаад “Тор: Харанхуй ертөнц”(2013), “Галактикийн хамгаалагчид”(2014), “Авенжерс: Ультроны эрин үе”(2015), “Хүн шоргоолж”(2015), “Ахмад Марвел” киног Дисней пласаас үзэх боломжтой.    

Дисней компанийн бас нэгэн бахархал “Оддын дайн” цуврал нь тус жагсаалтад багтсан байна. “Оддын дайн” цуврал төдийгүй холбогдох баримтат кино, телевизийн хүүхэлдэйн киног үзэх боломжтой үйлчилгээг нэвтрүүлжээ. Түүнчлэн “Оддын дайн” киноны ертөнцийг үзэх үзлээр бүтсэн “Мандалориан” цуврал тавигджээ.

Түүнээс гадна “Карибын тэнгисийн дээрэмчид” цуврал, Нэшнл географик контент зэргийг Дисней пласаас үзэх боломжтой. Энэ нь үйлчилгээ эхлэх өдөрт зориулсан зөвхөн бэлтгэл ажил. Бидний мэдэх Диснейн бүтээлүүдээс жагсаалтад багтаагүй бүтээлүүдийг үйлчилгээ нээгдсэний дараагаас дэс дараалалтай оруулна. Дисней пласаас л үзэх боломжтой контентууд байнга нэмэгдэх тул хязгааргүй сэтгэл татам гэмээр.  

Дисней плас үйлчилгээ 11 дүгээр сарын 12-ны өдөр Умард Америк, Канад, Нидерландаас эхэлж, 2020 оноос Европ, Азид үйлчилгээгээ тэлнэ. 

<ⓒ Reporter.mn >