A зэрэглэлийн жүжигчдийн Б зэрэглэлийн зомбитой кино, “Зомбиланд 2”

2019-11-08 18:43:55

Зомбиланд(2009) кино 10 жилийн дараа 2 дахь анги нь гарлаа. Зомбиланд 2-т өмнөх ангийн дүрүүд, тэдний үзэл санаа тэр чигээрээ үргэлжилж улам ухаажсан зомбинуудтай хэрхэн тэмцэлдэж байгааг харуулна. 10 жилийн дараа амжилт дагуулан ирж байгаа Зомбиландийн тухай танилцуулъя.

Зомбиландэд амьд үлдэгсэд зомбинуудтай тэмцэлдэж байгаа үйл явдал гардаг. Хаа сайгүй зомби болсон дэлхийд амьд үлдэгсэд аюулгүй газрыг эрж хайн аян замд гарна. Ингэхдээ тэд зомбигийн дайралтад өртөж, нэг нэгэндээ үл итгэх боловч эцэстээ хүч хавсран зомбинуудыг даван туулснаар амьд үлдэнэ.

Зөвхөн агуулгаар нь авч үзвэл Зомбиланд бусад зомбитой киноноос ялгарахгүй боловч үзэхээр өөр сэтгэгдэл төрүүлнэ. Юуны өмнө хаашаа явж байгаагаа мэдэхгүй содон дүр гардаг. Гэрийн мухар сахиж тоглоом тоглосоор байгаад санаандгүй амьд үлдсэн Колумб(Жесси Айзенберг) амьд үлдэх аргаа олсон ч хэт мэдрэг эмгэгтэй, айдсаа дэвэргэдэг залуу учраас зовдог.

Үзэлцвэл ч үзэлцчихье гэдэг Талахасси(Вүүди Харелсон) дуртай жигнэмгээ олж авах гэж зомбинууд шаваарсан дэлгүүрт дайран орж, гайгүй сайн хамтрагч болох нь дээ гэж бодсон эгч дүүс Вичита(Эмма Стоун), Литл Рок(Эбигейл Бреслин) нар тэднийг хэд хэдэн удаа залилж зугтдаг.

Зомбитой киноны байдаг л нэг зохиомжийг хүртэл инээдтэй болгож ашиглана. Колумб судалгаа, туршлагадаа дулдуйдан 30 гаруй арга боловсруулна. “Нэгмөсөн дуусга”, “Нойлд болгоомжил”, “Хатуужилтай бай”, “Ганцаараа явж болохгүй”, “Баатарлаг үйлс хэрэггүй” гэх зэрэг зомбитой олон киноноос харсан хэсгүүдээ сайнгүй жишээ болгон дурдаж улиг домог болсон өнгө аясаас зайлсхийнэ.

Дүрүүдийн талаар ч хэлэх юмтай. Вүүди Харелсон, Жесси Айзенберг, Эмма Стоун, Эбигэйл Бреслин нар нэг кинонд хамт байгаагаараа онцлог. 10 жилийн дараа ингэж нэгдэх амаргүй. Дээр нь Эмбер Херд, Билл Мюррей нар туслах дүр болно. Гэхдээ энэ хоёр гарч ирээд тун удахгүй үхнэ. Эмбер Херд зомби болж суултуурын таганд цохиулж үхнэ, Билл Мюррей харин хэлэхэд хэцүүхэн. Зомбиг дуурайн зомбинуудыг аргалж амьд үлдсэн тэрээр хүмүүст зомби гэж андуурагдан азгүйтэж буудуулж үхнэ. Хөгийн санагдавч дүрдээ орсон нь үзэгчдийн сэтгэлийг эрхгүй татаж, дараагийн анги гарахаар болжээ.

2-р ангид дэлхий зомбигоор дүүрч 10 жил өнгөрсний дараах үйл явдал гарна. Зомбинуудыг ялж амьд үлдсэн Талахасси, Колумб, Вичита, Литл Рок нар өөр өөрийн аргаар амьдарсаар байдаг. Гэвч зомби нар ч улам ухаажиж дахин аргалах амаргүй болж эхэлнэ. Амьд үлдэгсэд хамтдаа зомбинуудын эсрэг тэмцэж эхэлнэ.

10 жилийг тусгасан 2-р ангид эхний ангийн ориг дүрүүд, кино багийнхан бүгд оролцжээ. Зомбиландээс хойш хэр амжилтанд хүрснийг бодох бүр бахдам. Зомбиландээс хойш Вүүди Харелсон Three Billboards(2018), Жесси Айзенберг The Social Network(2010) киноны дүрээр Оскарын шагналд нэр дэвшиж Эмма Стоун La La Land(2016) киногоороо Алтан бөмбөрцөг, Оксарын шагналын эзэн болсон. Ингэтлээ нэрд гарсан жүжигчид нэг дор цугласныг нь бодсон ч киног үзэхгүй байхын аргагүй.

Зомбиланд: Давхар Тогшилт яг одоо кинотеатруудын дэлгэцнээ.