Теслагийн цахилгаан ачааны машин… сум нэвтэрдэггүйг үзүүлж байгаад шил нь хагарчээ

2019-12-05 01:17:57

Америкийн цахилгаан машин үйлдвэрлэгч Тесла компани Америктаа хамгийн томд тооцогддог ачааны машины зах зээлд гаргах томоохон бүтээл болох “кибер ачааны машин” -аа танилцуулжээ.

Теслагийн гүйцэтгэх захирал Элон Маск 11 сарын 21-ны орой Лос-Анжелесын Хоторн дахь Дизайн төвдөө цахилгаанаар ажилладаг кибер ачааны машины 3 загварыг хүмүүст үзүүлжээ.

Хэмжээний хувьд 5.86 м урттай, дөрвөн дугуйтай бага оврын ачааны машинтай төстэй.

Дан хөдөлгүүртэй загвар нь 60 миль хурд авах хугацаа 6.5 секунд, хос хөдөлгүүртэй нь 4.5 секунд, гурвалсан нь 2.9 секунд.

3.4-6.3 тонныг чирэх хүчин чадалтай, дан хөдөлгүүртэй загвар нь 1.6 тонн ачааг даана.

Үнийг 39000-50000 долларын хооронд багтахаар байлгана гэсэн амлалтандаа тэрээр хүрчээ.  

Элон Маск захирал цахилгаан ачааны машинаа 9мм хүртэлх гар бууны сум нэвтрэхгүй гэж танилцуулсан бөгөөд, сум нэвтэрдэггүйг нь хүмүүст үзүүлэх гэж Теслагийн тэргүүлэх дизайнер Фон Холцхаузенд машин руу төмөр бөмбөлөг шид гэж хэлсэн байна.

Холцхаузен эхлээд жолоочийн суудал талын цонх руу бөмбөлөг шидэхэд цонх хагарчээ. Элон Маск захирал "Ээ бурхан минь, их л хүчтэй шидэж дээ" гээд дахиад шидүүлэхээр болжээ.

Тэгээд Холцхаузен туслах суудлын цонх руу өөр бөмбөлөг шидсэн боловч мөн адил хагарсан байна. Хоёр ч удаагийн оролдлого бүтэлгүйтэхэд Элон "Муугүй шүү. Сайжруулах боломжтой" гэж хэлээд өнгөрчээ.

Гүйцэтгэх захирал Элон Маск "Бид эрэг чангалах түлхүүр ч шидэж үзсэн, тэр байтугай гал тогооны угаалтуур хүртэл шидэж үзэхэд цав ч суугаагүй юмсан", "Сая л ийм юм болчихлоо" гээд инээжээ. Эцэст нь "Яасан юм бол, бүү мэд", "Шалтгааныг нь олоод засаж залруулах болно" гэжээ.

Кибер ачааны машинаа ийнхүү танилцуулснаа хойш тухайн өдөртөө хөрөнгийн бирж дээр Теслагийн хувьцаа 6.14% унажээ.