“Өнгөрсөн Зул Сар”-ын гайхалтай хайрын түүх

2019-12-06 16:11:55

Кэйт(Эмилиа Кларк)-ийн жинхэнэ нэр нь Катарина. Тэрээр багадаа эцэг эх, эгчтэйгээ хамт дайн болж байсан Югослав улсаас дайжин Англид ирж суурьшин Кэйт гэж нэрээ өөрчилөн. Гэрийнхэн нь түүнийг Катарина гэж дууддаг боловч Кэйт гэрийнхэндээ дургүй байлаа. Ганцхан чемодантай гэрээсээ гарч, зул сарын чимэглэл зардаг дэлгүүрт цагийн ажил хийж, найзындаа хоног төөрүүлдэг нь ийм учиртай. 

Түүний цорын ганц мөрөөдөл нь дуучин болох. Гэвч тэрээр шалгаруулалтад байнга унаж, цөхрөлд ордог. Зул сарын баярын өмнөх нэгэн өдөр, ямар ч зорилгогүй тэнүүчилж, хэрэг тарьж явдаг байсан тэрээр орон гэргүйчүүдийн төвд сайн дурын ажил хийдэг Том(Хенри Голдинг)-той санамсаргүй тааралддаг. Тэр өдрөөс хойш Кэйтийн явсан газар бүрт тааралдах болсон Том. Тэд Лондон хотоор хамтдаа зугаалж, цагийг өнгөрөөх ба Кэйт түүнд бага багаар татагддаг. 

Зүрхний хүнд мэс засал нь түүнд сэтгэлийн гүн шарх үлдээж, хүрд шиг эргэлдэх амьдралд шантарсан Кэйтэд нэгэн өдөр гэнэт гарч ирсэн Том бол Сантагаас өгсөн бэлэг гэлтэй.  

Түүнтэй хамт өнгөрүүлсэн хэдхэн цаг анзааралгүй өнгөрч болох нэгэн жижиг гудамжны үзэсгэлэнтэй сайхныг харуулж, бусдад найдахаас илүүтэйгээр өөрийгөө илүү хайрлан хамгаалахыг сурган сануулж буй.

“Өнгөрсөн Зул Сар” бол эрэгтэй, эмэгтэй хоёр хүний уулзалтаар Кэйт ухаажиж байгааг харуулсан хайрын тухай кино. Мөн Югослав улсаас цагаачилж ирсэн Кэйтийн гэр бүлийн амьдралаар Англи дахь дүрвэгчдийн асуудлыг хамтад нь хөнджээ.

Тус кино нь яг одоо кинотеатруудын дэлгэцнээ гарч байна.