Энэ оны хамгийн их хүлээлт үүсгээд буй Холливудын бүтээлүүдийн нэг болох Avengers: Doomsday кино 12-р сарын 18-нд дэлхий даяар нээлтээ хийх гэж байна. Марвелын ертөнцийн хамгийн хүчирхэг хорон санаатнуудын нэг болох доктор Дүүмийн эсрэг супер баатрууд урьд өмнө байгаагүй өргөн бүрэлдэхүүнээр нэгдэж, ширүүн тулаан өрнүүлэх ажээ.

Алдарт найруулагч ах дүү Руссогийн найруулсан тус кинонд ер бусын хүч чадал, хосгүй оюун ухаантай доктор Дүүм дэлхий ертөнцөд заналхийлж эхэлснээр киноны үйл явдал өрнөнө. Тэрээр Латвериа улсын удирдагч төдийгүй гоц ухаант эрдэмтэн, хүчирхэг шидтэн юм. Өмнөх кинонуудад Танос асар их биеийн хүч, хязгааргүй эрх мэдлээрээ орчлон ертөнцөд заналхийлж байсан бол доктор Дүүм оюун ухаан, нарийн тооцоолол, ер бусын чадвараараа хавьгүй өөр түвшний аюул занал учруулах нь. Түүнийг зогсоохын тулд Марвелын баатрууд хүчээ нэгтгэхээс өөр аргагүйд хүрнэ.

Avengers: Endgame киноноос хойш долоон жилийн дараа Стив Рожерс, Тор нар эргэн ирж, шинэ тулаанд нэгдэх гэж байна. Тэдэнтэй хамт Икс-хүмүүс, Гайхамшигт дөрөв, Вакандагийн дайчид хүртэл нэгдэж байгаа нь киноны хамгийн сонирхолтой хэсгүүдийн нэг байх нь гарцаагүй. Өөр өөр ертөнц, цаг хугацаа, үзэл бодолтой баатрууд нэг зорилгын төлөө хэрхэн нэгдэж, хамтран тэмцэх бол мөн өвөрмөц зан чанар, өөр өөр чадвартай эдгээр дүрүүдийн харилцаа, хамтын хүч доктор Дүүмийн эсрэг хэрхэн нөлөөлөх нь үзэгчдийн сонирхлыг эрхгүй татаж байна.

Марвелын түүхэн дэх хамгийн томоохон тулаануудын нэгийг амлаж буй Avengers: Doomsday нь супер баатруудын шинэ эрин үеийг эхлүүлэхийн зэрэгцээ тэдний хувь заяаг шийдэх шийдвэрлэх тулааныг дэлгэцнээ авчрах юм. Ийнхүү 2026 оны хамгийн том блокбастеруудын нэгээр нэрлэгдэж буй тус бүтээл оны төгсгөлд кино сонирхогчдын анхаарлын төвд байх нь дамжиггүй.

Уг тулаант блокбастер кинонд Роберт Дауни Жуниор, Крис Хемсворт, Ванесса Кирби, Том Хиддлстон, Патрик Стюарт, Иэн Маккелен, Ченнинг Татум, Педро Паскал, Крис Эванс нар болон бусад алдарт жүжигчид дүр бүтээжээ. Харин Avengers: Endgame зэрэг Марвелын өмнөх хит бүтээлүүдийг найруулсан Энтони, Жо Руссо нар найруулагчаар ажилласан байна.